Eltje Doddema.

t Waark blift in de wereld en wie goan der uut, heur je voak zeggen. Das woar, mor wil je nait aal te vroug boeten de boot valen, zel je t waark nait links liggen loaten kinnen. Je mouten wat uut stro zetten, omreden: van de wind kin je nait leven. Vandoar dit moal t woord 'wind'.

Der binnen lu dij, as t mor even kin, aaltied as de wind aan t waark goan. En t moakt heur nait uut, uut wat veur houke de wind waait. Waark is noamelk wind op heur meulen. En as t heur din ook nog veur de wind gaait, din hebben ze hailendaal reden om as de wind te lopen.

Nou vuilen paardielu wel ais de drang om net te wezen as de wind waait. Dij goan net zo goud mit n windhoze mit as mit n zaachte zudewind. Doar kin je ainglieks gain paail op trekken. Nou binnen t veur de wind aalmoal gain scheuvellopers, das woar. Mor zo gaauw t windstil is, maark je al hail gaauw wel de wind ter goud onder het.

Nou is d'aine wind d'aandere nait. n Gulle wind kin je beter mor nait tegen hebben, omreden as je de wind van veuren kriegen je veul wieder van huus binnen. Ook Veendammer wind is nait te begeren. As dij wind opstekt kon je wel ais de wind vlaigen zain en dat je din veur n windhapper of n windboele aanzain worden is nait denkbeeldeg. Mor goud, ie kinnen ja aaltied nog n wind loaten, omreden wind op regen aarbaidt. Dat zeden ze vrouger tenminste. Of t woar is wait ik nait. Loat in elks geval de wind nait deur d'hekken waaien, ook al deugen n krimpende wind en floitende vraauwlu nait. De volgende road mout je veuraal nait in de wind sloagen: vechten tegen windmeulens het totoal gain zin.

Nou wait ik wel: dij nait woagt, dij nait wint, mor veur je der op verdocht binnen wait je nait meer uut welke windstreek de wind waait. Mor goud, gaait de wind hailendaal liggen en je willen toch de wind in de zaailen hebben, neem din n bakkie troost, omreden as kovviebonen knappen komt ter wind. En das ook schier veur n winddroake.

Bie dizzen moak ik (veurlopeg?) n inde aan dizze column, omreden de tied mie langer ontbrekt. Boetendes mouten de windveren neudeg in de vaarve.

Moi hor.