Lou Meyer.

In t begun
tèllen de joaren nait.
Haalfweg komt de twievel,
mor tellen de moanden nait.
Older en loater
wordt elke dag aine.

In t begun
allain
zo klaain
en zo'n grode wereld.
Op t ìnde
weer allain
weer klain
en de wereld?

Gruin gras, zo vris
woar j'ook kieken.
Mor t was en is
nait allènt veur de rieken.
t Is veur elkenain
dij t mor wil zain.

Noa t bluien
komt t gruien.
En t is wel sneu
mor t gruine gras
wordt toch gele heu.

Net as bie mìnsen
mit de joaren wel wiezer
mor t swaarde hoar
wordt ook griezer.

n Grieze kevòt
n braif mit n swaarde raande.
k Vòl hom open
mit trillende vingers.
Weer te vroug, te jong,
en aalmor bliekt
dastoe t leven
kinst ontlopen
mor de dood nait.

Noast mien schip zag k n eendenust
moeke eend bruide in aale rust
k Gaf heur stoede en telde d'aaier
t waren vattien, wat n legzaik daaier
Schienboar gain wait van ainegst hinder
mor dammeet n ploug van vattien kinder
Pabbe eend was vot, uut frustroatsie?
dat wui loater n fikse alimentoatsie.