| Menu |
 |
 
 
| Wat is. |
|---|
|
Moak aan! schiet op!
|
|
|
Barta Meulenkamp.
Gedicht.
|
Snij!
In t schiensel van d'lanteern
dwarreln dikke pluusters;
as veertjes zo licht
verswinnen ze in t duustern.
Stoadeg valen z'omdeel,
as vlijt n zörgsoame haand
n dikke, donzen deken
over t sloapende laand.
In gedachten
zai k bloumen op t roam;
ik bloas n kiekgat
mit mien waarme oam.
Snij! Gaauw votmoaken
en mit slee noar boeten!
Snijbalen gooien,
mor nait tegen de roeten!
Gliesterboanen moaken,
spek- en spaigelglad,
en dij nait oetkikt,
dij vaalt plat op t gat!
Pas as moeke ropt,
is t maaljoagen doan;
t is duuster en tied
om noar binnen te goan.
De nacht is weer kòld,
mor d'kroeke waarm.
Ons snijkeerl holdt de wacht,
moeke's bezzem in d'aarm!
In t schiensel van d'lanteern
dwarreln dikke pluusters;
as veertjes zo licht
verswinnen ze in t duustern.
|
|
|
| De Schriefster |
Noam: Barta Meulenkamp-Bonder
Geboren: 8 nov. 1955 in Veendam
Woont in: Finnerwold
Schrift al: sunds 2002
Ik bin geboren op 8 november 1955 in Veendam as aine van n twijling. Ik woon al weer sikkom 30 joar in Finnerwold en schrief sunds n joar of tiene òf en tou n Grunnegs stokje veur ons dörpskraantje, mainsttied over hail doagse dingen, dij, as je de humor der van inzain kinnen en dij din n beetje leuk opschrieven, mien levent inains n stok minder saai moaken, liekt t wel! Dat dou ik dus in t Oldambts, al was dat wel even wìnnen, want mien roots liggen in de Veenkelonies, mor t is intied al sikkom n twijde noatuur worden.
As ik n stokje kloar heb, vind ik t slim zunde dat t weer doan is en bin k touglieks baange dat k op n keer niks meer wait om over te schrieven. Ik hoop aaltied dat zok ter din gaauw weer wat veur dut om over te vertellen. Din maggel ik dat, onder t kovviedrinken, eerst op pepier, allaint leesboar veur miezulf, as heb ik t gevuil dat n aander t nog mor nait onder ogen kriegen mout. Soms belandt t krabbeltje din eerst in d'loa, om dij òf en tou, bie n ingeven,weer te pakken. Mien stokjes gruien dus in d'loop van tied en pas as ik dìnk dat t wat is, goa k t verder oetwaarken. Doar gaait mainste tied in zitten: schoaven en schuren nuim ik dat, mor gelokkeg kin ik dat "geknuter" lekker achter mien pc doun en nait in n kòld schuurtje, want aans was ik voak n moal stòk en stain verkleumd!
Hail òf en tou heb ik n idee veur n fantoasieverhoal, mor ik vind dat n hail stok stoerder as t over n beleven van mie (en de mienen) te hebben.
|
| Ie ook? |
Schrieven ie ook gedichten in t Grunnegs, en willen ie ze hier ook wel ploatsen?
Kiek den ais op de Openings bladziede en vul t formeliertje in.
|
|
|
