|
Week 0141
Aai.
Paardielu hebben t ter slim stoer mit om zok in dizze jachtege wereld stoande te holden. Mennegain gaait ter din ook onderdeur en dij de kop wel boven wotter holden kin, het muite om zien aai op t rechte stee kwied te worden. Vandoar dit moal t woord "aai".
Nou binnen der manlu onder ons, dij der gain perbleem mit hebben om makkelk n aai in n aandermans nust te leggen. Ze binnen nait ainkenneg, zeg mor. Ze binnen van mainen dat ze heur aaier nait aalmoal onder ain hinne leggen mouten. Dat kin wel wezen, mor n schoaltje van zo'n aai kin flinterdun wezen en voak is t din ook zo dat, as zo'n aai brekt, t aldernoarste slim stinken gaait.
In zo'n geval is t mit de wettelke echtgenote ook voak gain kouk en aai meer. Nee, dij zel vervast veur heur aigenste koekoek gain aai weer kloppen veur n wenteltefie of zokswat. Dat wordt zulfs gain snee zoepen en n hoaneaai meer. En ze zel ook nooit weer aaierlint bruken om hozebanden aan de onderboksem van heur overspeulege ega te zetten.
In zo'n geval kin dij Don Juan mor beter aaier veur zien geld kaizen. Mor elk aai is nait geliek. Want zee boer nait: n aai is n aai en greep dou de dikste? Dij wol e vervast ook nait veur n appel en n aai verkopen. t Moakt ook nog wel even n verschil of je n eendeaai, n ganzeaai of n doeveaai te pakken hebben. En t is ook slim sneu as je van t aaierrikje n gobaai pakken. Toch kinnen ie t beste mor tevreden wezen mit t aai dat je kriegen, omreden: beter n haalf aai as n lege dobbe. Joa toch.
Traauwens: binnen ie tevreden mit wat ter uut joen aigen aaier kropen is? t Jonkgoud is wel ais wat antammeg, zeggen ie? Tja, elk wait toch dat, as je gain kwoaie kukens hebben willen je d'aaier in de panne sloagen mouten. Mor dat begroodde joe doudestieds zeker. Nou, hou t ook is: bedenk in elks geval dat je kinder beter sturen kinnen mit n aai as mit n flik.
Tot aankommen moal. Moi hor.
|
