Eltje Doddema.

Lestdoags heurde ik n antwoord van n bekende politicus. n Verslaggever haar hom n gewaitensvolle vroage steld en ik haar t gevuil dat t antwoord weer dichter bie de leugen as bie de woarhaid lag. En ik docht nog: handege lu dij politici, zai binnen zo glad mit de mond dat je ze nog net gain leugenpuut nuimen kinnen.
Nou wol k t dit moal nait hebben over 'de leugen' mor over t woord 'puut'.

As je aan puut denken denk je ook votdoadelk aan geld. Der schienen noamelk lu te wezen dij meer mit de puut kinnen as mit t geld. En der waren lu dij deden vrouger heur boukholden achter op n tebakspuutje. Op zich is doar niks mis mit, netuurlek.
Mor der binnen ook lu dij mekoar mit de lege geldpude om d'oren haauwen. En der schienen ook puutholders te wezen dij der wel ais mit de geldpuut van de verainen vandeur goan, mit of zunder vrund of vriendin. De puut krigt din n negatieve betaiken en dat kin toch nait de bedoulen wezen.
De milieuvrundelke tippuutjes, woar je vrouger joen baaltjes in kregen en de aandere pampieren puten worden zowiezo aal minder bruukt. Puut en plastiek is zo stoadegaan ain worden en din is n puut n zak en das bepoald gain komplement.

t Wordt doarom tied om t woord puut weer zien, van oldsheer verdainde stee in onze streektoal weeromme te geven. En de meugelkhaid dut zok nou veur lu.
De toupazen van alerhande technische meroakels in auto's dut de puut nij leven inbloazen. Was t eerst nog mor bie de duurdere auto's t geval, op t heden het elke auto standoard n plofpuut. Voak ook al aine aan de bestuurderskaande. De puut kin dus joen levensredder worden.

Nou hoop ik wel dat de plofpuut n verborgen leven lieden blift, omreden as je hom zain din is der wat mis. En goud ook. Paas dus goud op onder t rieden en bedenk wel dat ie beter op n puut mit vlooien pazen kinnen as op n joen dochter. Mor loat t wicht wel n 'kledderpuut' mitnemen. Of beter nog: twije.

Tot aankommen moal. Moi hor.