Eltje Doddema.

Elk moal verwonder ik mie der weer over dat de teksten veur 't Woord van de Weke' langs dizze weg in ale houken en hörns van de wereld te lezen binnen. t Zol toch ook wat wezen lu, as 't Woord' elk moal mit n postdoeve bie joe aankommen zol. Nee, tegenwoordeg gaait t via t digitoale web n bulde makkelker en vlogger. Doarom dit moal t woord 'aankommen'.

Alhouwel t schier is dat je uutìndelk op t stee aankommen woar of je van plan wazzen hin te goan, is aankommen op zich aigenlieks mor niks. Veul lu willen noamelk stommegeern dat ze nooit aankommen waren. Hou of ik dat bedoul wollen ie waiten? Nou, dat maarken ze bieveurbeeld smörgens as ze, noa heur doagliekse hemmeltjederij, even uut nijsgiereghaid op de weegschoale stoan goan. t Muit heur din votdoadelk dat ze dij stap doan hebben, omreden t komt heur der niks op aan dat ze zain dat de wiesder weer meer uutslagt as de veurege moal.

Nou wait ik wel dat t nait allind op t liggoam aankomt, mor ik heur joen partner al, as ie aankommen mit de tieden dat je de leste weke al weer drij pond aankommen binnen. Je kriegen vervast de board ter of, ook al heb je dij nait. Nou en zo'n scheerderij komt haard aan, leuf dat mor van mie. Doar binnen al mennege reloatsies deur verbroken. Ook LAT-reloatsies vanzulf.

Nou huif je, om aan te kommen, mainstied nait aal te veul meroakels moaken, tenminste as je de verhoalen van de lu dij t waiten kinnen leuven maggen. 't Liekt asmis wel of t vanzulf gaait,' zeggen dij. Ach lu, ie mouten mie nait mit dij meneuvels aankommen. Der wordt nait veur niks zegd dat elk pondje deur t mondje gaait. Deskundegen binnen noa daipgoand onderzuik aan dij wieshaid kommen.

Der aankommen is traauwens makkelker as der ofkommen. Dat mag dudelk wezen. Hou ik doar aankom? Ach, ik bin toch ook n mins van vlais en bloud. Wat zeggen ie? Ach joa netuurlek: t vet mout netuurlek ook nait vergeten worden. En nou mor gaauw even kieken houveul ie dizze weke aankommen binnen.

Tot aankommen moal. Moi hor.