Eltje Doddema.

Dezember is nait allind de leste moand van t joar, t is ook de moand van Sunterkloas, roodneuze Rudolph en de Kerstman. Mit heur drijen vechten ze din om de macht en t mankaaiert ter nog mor aan dat ze mekoar de zak geven. Vandoar dit moal t woord 'geven'.

Rudolph blift vervast aaltied zien beste geven, mor de vroage is netuurlek of baaide manlu heur affeer der ooit aan geven zellen. Alhouwel, de mainste lu geven doar ainglieks nait veul om. Wat zeg ik? Dij geven der hail gain acht op. Veur heur is dezembermoand n moand van geven en nemen. t Beste is din wel dat je aine geven wat ain toukomt. En ie waiten vervast ook wel: geven is geven en holden is holden.

En bedenk ook: ains geven, blift geven. t Zol toch ook gain pas geven as je joen net geven kedo weeromme vroagen. En toch, der binnen lu dij naargens noa geven. Traauwens, ik wil joe ook nog wel even te verstoan geven dat, wat je geven nait aaltied wat materiëels wezen huft. As je bieveurbeeld aine waarmte geven, kin dat dij persoon weer moud geven en aine d'aandacht geven dij ain toukomt is ook nait verkeerd.

Dat is t wel as je aine onterecht de schuld aargens van geven of as je aine perbaaiern wat in de mond te geven. Lu konnen joe din wel ais de gele koarde geven en joe dat op joen brood geven of slimmer nog: aine kon joe wel ais n tjijs veur de kop geven. En veur n goie verstandholden wil ik joe din gain dubbeltje meer geven. Nee, ie kinnen joe beter mor n goie holden geven.

Tot slot wil ik joe nog n goie road mitgeven. t Is veuraal veur de lu dij zok ofvroagen of je van geven riek worden. Ik kin joe doarop mor ain antwoord geven. Joa, mits elk n geven peerd nait in de bek zugt. Belangriek is in elks geval dat je t goie veurbeeld geven en geven blieven. En netuurlek: nooit de moud opgeven as t ais n moal tegenzit.

Tot aankommen moal. Moi hor.