|
Week 0151
Vree.
Overaal in de wereld kriegen lu in meer of mindere moate direkt of indirekt te moaken mit geweld. Dat je n kander mit vree loaten is bliekboar n ideoal dat veur veul lu bloots inkeld in de Kerstgedachten noar veuren komt. Doarom dit moal t woord 'vree'.
t Liekt mie zo tou dat de mainste lu vree hebben willen en in vree mit n kander leven willen. Mor der binnen meer lu dij van n aander gain vree hebben as lu dij in vredeghaid mit n kander leven. Vree op eerde is veur veul lu din ook n ideoal dij nait beriekt wordt. Das ook ja gain wonder. Bloots 40% van de minshaid leeft in echte vrijhaid en kin mit vree leven, las ik.
Bie dij 40% lu dij vrij en mit rust en vree leven kinnen, heuren wie ook. Wie kinnen inderdoad vreedzoam noast n kander leven en wie kinnen in vredeghaid mit mekoar proaten. En veul lu leven hier gelokkeg ook vredeg in ale vreedzoamhaid. Mor der binnen ook bie ons nog veul te veul woarbie de huselke vree ver te zuiken is en dij gain stee hebben om mit vree te zitten.
Ook in landen woar vredeskongrezzen holden worden, woar vredesdoeven vlochten moaken, woar vredespriezen uutlangd worden en woar de vredesvlage in vredestied vredeg wappert in de wind, kin je mit de toustand in ook dij landen toch nog laank gain vree hebben. Ook al kommen doar de lu de Kerstdoagen wel vreedzoam deur. Of is t toch meer vreetzoam mit n 't'?
Nee, redens om veul vredesvuren te ontsteken binnen der ainglieks nog nait. Toch wìns ik joe veul vree tou.
Tot aankommen moal. Moi hor.
|
