Eltje Doddema.

Der binnen gemainten woar of je bie zummerdag n lichtroute rieden kinnen. Lu hebben din de toenen schier verlicht en Jan en Alleman trekt ter, aal of nait motoriseerd, bie langs. Mor om dis tied van t joar kin je veur n lichtroute overaal terechte. Vandoar t woord 'joar'.

t Het netuurlek te moaken mit t inde van t joar. De joarkelender het nog n poar bloadjes en dat betaikent dat de joarwisseln stoef veur deure staait. t Nijjoarsiezer wordt weer invet en de nijjoarskouken worden weer bakt. Joar in joar uut t zulfde ritueel. Behaalve wat de verlichten betreft. Dat wordt van joar tot joar slimmer liekt t wel. Deden ze t in vrougere joaren mit n ainvoudege kerstboom, tegenwoordeg wordt t joarfeest vierd mit n overdoad aan licht. En de joarmaarkten vinden om dis tied ploats in de toen- en winkelcentra. Nou zeggen ze wel dat t verstand mit de joaren komt, mor as je wat op joaren kommen, wil dat nog nait zeggen dat je joen joargeld verstandeg besteden. Veurbeelden genog, nee din?

t Begun van t Nijjoar staait garant veur t opstellen van joaroverzichten, joarversloagen en joarsievers en t joarverbruuk van t gas en t elektries kin ook weer op moakt worden. Of joen joarseloares doarveur touraaikend is mout nog blieken, zeker is in elks geval dat je weer uutkieken kinnen noar joen joarliekse joaropgoave. De vroag is din, of je in ain joar kommen mit de belasteninspekteur. As je de boudel besijbeln, bin je in elks geval nog nait joareg.

Ie binnen mit mie vast wel in ain joar as ik zeg, dat ik hoop dat wie nog n poar dikke vedde joaren kriegen. Net as n kou. Dij kin ook n dik joar hebben. Doar bedoulen wie din de koutidde mit. Alhouwel, t is wel te hopen dat wie t aankommen joar de BSE onder kontrole holden. Aans konden t, veur wat de gezondhaid betreft, nog wel ais haile moagere joaren worden.

Tot aankommen moal. Moi hor.