Eltje Doddema.

Vaalt t joe ook op lu, dat de jeugd van tegenwoordeg zo goud Engels kin? Ain van de mainst gebruukte woorden is 'shit'. Op zien Grunnegs is dat 'schieten' en lovve t doar mor ais over hebben.

Nou ligt t veur de haand dat t n strontproatje wordt, mor in dat geval zol k ja in de schiet zitten, nee din? Boetendes kon ik mien ontslag din wel ais kriegen bie Dideldom en ie waiten dat, as ie n mieg-op-berre votjoagen, je voak n schiet-op-berre weerom kriegen. Nou, dat wil ik joe nait aan doun. Wat hejje nou ook mit schiet as ie gain laand hebben!

Boetendes mout je gain muite moaken om n schieterij, lu. Das slecht veur t haart. Je mouten gewoon eten van t beste en schieten van t minste. Neem t ter van zo laank t nog kin en wees schietgelokkeg.
Das veul gezonder as dat ie moud hebben as n schietvlaig om Midwinter. En wel holdt ter nou van om zok op kop schieten te loaten.

Nou binnen aal lu nait geliek. Ie mouten acht geven op lu dij in ain pot schieten en hom mit nkander leegdroagen. Dij binnen nait te vertraauwen. Doarintegen hebben lu dij zo wies binnen as t schiethuus van Bremen t hoog in de kop. Ook niks weerd dus. Schietpotten bin t en t is doar voak schiet van gold. En wat mout je nou mit lu dij aaltied achteraanschieten kommen. Dij binnen voak net zo gaauw as n schietmug om Nijjoar en aan zoksoort lu hejje netuurlek ook niks. Net zo min as aan n schiet-op-e-hakken.

En din hejje netuurlek dat schietgoud van tegenwoordeg. Dij mainen dat heur ol lu n peerdje schietgeld op staal stoan hebben en denken dat alles kin. Nou schit de duvel wel voak op bulten, das woar, mor wel wil nou mit dij van doun hebben. Ik in elks geval nait. Mor ja, ik bin din ook n dikke bangeschieterd.

Dat je mit 'schiet' zoveul kaanten op kinnen haar je vervast nait docht. Nee, n woord kin joe voak op t verkeerde bain zetten. Wozzen ie dat n dikschieter nait t tegenovergestelde is van schieterij mor gewoon n zangvogel is. Nou ja, aal mit mekoar n dikke schietboudel dus.

Tot aankommen moal. Moi hor.