Eltje Doddema.

Overaal woar ik mien ogen en oren de kost geef wor k konfrontaaierd mit rekloame. Ook in mien aigen huus wor k ter mit overvouerd via bievubbeld radio en televizie. t Gaait mie din ook aal meer tegen stoan. Doarom dit moal t woord 'tegen'.

Zulf staait mie rekloame via de telefoon slim tegen. Kiek, rekloame dij tot mie komt via de radio of de televizie kin k tegenholden deur d'apperoaten uut te zetten. Mor tegen dij telefoonterreur is t stoer om ofdounde tegenmoatregeln te nemen. Zokse telefoontjes kommen, as t even tegenzit, mainsttied voak tegen etenstied en dat allind al stöt mie tegen de borst. Veurdak tegen zo'n mooiproater zeggen kin dak ter op tegen bin, geft de persoon in kwestie, mien tegenhanger om zo mor ais te zeggen, al tegengas. Ik bin al zover dak nait meer tegensparrel en tegensputter, omreden mien tegenstander aan d'aandere kaande van de liene levert din ook aal meer tegenstried.
Boetendes, ik heb din ook t gevuil dak tegen de stroom in foksel en joe kinnen beter mitvoaren as joe der tegen verzetten, nee din?

Ik goa tegenwoordeg even lekker tegen de keer in, wel beleefd hor, mor t wordt n soortement van gevecht van man tegen man (of vraauw). Even mooi tegenappelaaiern, zo van: Mag ik joe wat vroagen? En din nee zeggen. d'Tegenpartij vragt vervast woarom ik dat nait wil. Din goa ik doar tegen in deur te zeggen dat dat n vroage is. En zo kin je zo'n beller schier tegenhaspeln.

As je der nou nait tegen bestand binnen, kin je der aaltied nog n borrel tegenaan gooien. Nou mout je dij nait tegen heug en meug opdrinken. Dat zol slim schaande wezen. Mor ach, as je t aal tegen t licht holden is t ainglieks ook veul beter om vrundelk tegen n kander te wezen. De mainste lu hebben doar vervast niks op tegen en zellen zok doar ook nait tegen verzetten. En lu dij, tegen beter waiten in, mit de kop tegen de mure lopen, zellen der aaltied blieven.

Mor goud. Zunder tegenbericht staait ter op dit stee weer n nij woord van de weke. Teminnend as ie der niks op tegen hebben.

Tot aankommen moal. Moi hor.