Eltje Doddema.

n Mìns is n roar wezen, lu. Je waiten nooit wat je aan hom hebben. Op t aine mement kin je mit hom aaiden en plougen en op t aandere mement dut e joe leuven, dat eerleke lu der mor dun lopen. Doarom dit moal t woord 'dun'.

Der binnen inderdoad lu dij veur mekoar deur dik en dun goan. Dat het mainsttied nait mit heur uterlek te moaken. Zo kin bievubbeld aine dij zo dun is as n snouk best deur ain deure mit n persoon dij wat dunhoareg is, mit of zunder dunderhoud. En ain dij tussen de duneggen wat slicht is huft gain perblemen te hebben mit n dundaarm van n wicht of ain dij van elke scheet n dunderslag moakt. En ook al is de dunder asmis nait van de locht en zai je veul dunderkoppen aan de locht, t wordt aaltied wel weer dun achter dik. Alhouwel, t is toch wel slim verstandeg dat je bie dunderachteg weer n dunderkedde op t huus hebben.

Nou schient dik tegenwoordeg gain mode te wezen. t Is aal mor dun en laank wat de rekloame ons aanproaten wil. Laank, dun en lekker dus. Of zo as ze zo schier zeggen: nait dik, dun is de mode. Behaalve op n homstok stoede. Doar mout je weer gain dun loagie op smeren en joen rum mout je ook nait te veul verdunnen mit cola.

Och, as t om t geld te doun is wordt joe aanproat dat je alles, woar n aander wat aan verdainen kin, voak nog even dunnechies overdoun mouten Mit geld wordt nou ainmoal geld verdaind. Mor dat wozzen ie toch wel? Dat komt toch nait as n dunderslag uut n heldere locht? Veuraal de lu dij net doun asof ze t in Keulen dundern heuren, mout je in de goaten holden. Dij heuren vervast nait bie de dun bezaaide eerleke lu.

Wat zeggen ie: t vaalt over t aalgemain wel mit? Mooi veur joe. Din lopt t joe vervast ook nait voak dun deur de boksem en kinnen ie aankommen moal weer 'inloggen'. En dat nait allind op n dunderdag hoop ik.

Tot aankommen moal. Moi hor.