|
Week 0211
Bak.
Ain moal in de vattien doage is de beurt aan mie veur n nij woord van de weke. Ik mout dus aan de bak, zo as dat zo mooi hait. Vandoar dit moal t woord 'bak'.
Nou kin je beter aan de bak mouten as in de bak zitten. Doar krieg je as je aan de bak zitten volgens zeggen wotter en brood in joen etensbak. Brood, woar de bakker zien wief deurkropen is. Nou kin je doar meschain wel liggen as n bakkersmot, mor ik eet mien melkenbak, krindebak, roggenbak of twijbak toch laiver boeten de bak. Ze zeggen wel dat ter overaal brood bakt wordt, mor ik goa toch laiver in mien aigen huus van de bak noar t gemak. Ie toch ook?
Ik vroag mie traauwens of of ie net as de swienen aan de bak goan. Ik wel. Ik bak ter wat dat betreft niks van. Zo bin ik ook nait bakt. Wel bak ik ter zo nou en din ain wel ais aine veur. Mor dat nait bie ain dij aan de mure vast bakt van soeteghaid. Din bin k ja bakkeraan. Doar mout ik niks van hebben. Net zo min as dat je om n bak zoad n meulen baauwen. Das onnut.
Nee, din goa k laiver bakjegooien of, as t gain bakstainen vrust, dus as de snij goud bakt, n bakbaist van n snijpobbe moaken. Och en zo of en tou n schiere bak vertellen is ook toch nooit vot.
Mor hou t ook is. De bak komt nog aaltied nait bie t swien, mor de swien bie de bak. En zo zel t ook aaltied wel blieven.
Tot aankommen moal. Moi hor.
|
