|
Week 0215
Goud.
Der binnen hail wat lu dij overaal kommentaar op hebben. Lu dij alles negatief benoadern en dij deur t leven goan onder t motto van: t Is nooit goud of t deugt nait. Doarom dit moal t woord 'goud'.
Nou is t netuurlek inderdoad nait goud as t goud mis is. As je n kander bievubbeld gain goud woord geven of as je nooit gain goud woord van aine kriegen. In sommege huusholdens is der doarom din ook al hail wat staingoud en theegoud sneuveld. En ach: ie kinnen t toch beter ook zo gaauw meugelk mor weer goud moaken en goud op n kander wezen, nee din?
Nou is der gain lozer goud as minsen en elk wait din ook dat goud goud is, mor beter beter is. Zo is goud geld verdainen in n körde tied de trend. Ie kinnen joe din te goude doun aan de geneugten dij t leven te baiden het. Veuraal de lu dij goud glad binnen, hebben t ter din goud mit. Ze lopen din ook d'haile dag in heur sundoagse goud en hebben voak mit t goud geld verdainen de goudkeuren van de femilie.
d'Aarfgenoamen komt dat noamelk goud van pas, omreden as ie goud en wel uut tied binnen ze op n gegeven mement t goud dailen kinnen. t Is toch ook aibels schier as je wat te goude hebben, nee din? En boetendes: n aarvenis is roofgoud. Joa toch?
Mor goud. Veur t zulfde geld aarf je gain dik kaptoal mor bontgoud, witgoud of wat overgebleven pootgoud. En t gedienegoud mout je din meschain ook nog zulf veur de vensters vothoalen. Dat doun ie netuurlek uut goudens en gouderdeugde, omreden ie binnen ja n goudhaals. Mor bedenk wel: veur joen femilie is al gaauw aal te goud aandermans gek en as ie t goud doun is t ook nog niks meer as goud.
Mor toch: ie kinnen beter zo goud as gold wezen. Want gold das weer goud... in t Nederlands din.
Mor goud: t Is aal goud zo. Tot n aander moal.
Tot aankommen moal. Moi hor.
|
