|
Week 0217
Gek.
Stellen ie joe ook wel ais de vroage lu, in wat veur wereld wie ainglieks leven? Ik wel. Veuraal as k per ongelok ais zap langs ain van dij big brother, big diet of big tits pergrammen. t Liekt mie tou dat elke gek dij veur n kamera zien boksem zakken let tegenwoordeg op de televizie kin. Doarom dit moal t woord 'gek'.
De wereld om ons tou liekt asmis wel n gekkenhuus. As je joen ogen en oren goud de kost geven kom je tot de konkluzie dat ter genog lu rond lopen dij gek in d'hakken binnen. Dij nog gekker binnen as gek en dat nait allind van goudgeleuveghaid. Nee, dij hebben gain nood van gek worden, dij binnen as zo gek as n deure.
Nou is t zo, dat as minsen gek worden t heur op de kop aan komt en das gain gekkeghaid. Zo binnen der lu dij gekke drifteg worden kinnen of zo gek binnen as n woagenrad, mor hou gek je ook binnen: t Is gain gek dij t veurdut, mor dij t noa dut.
Nou mout je mit n gekkenspul nait de gek hebben vanzulf. Kiek, zo of en tou wat gekjoagerij of gekscheerderij der tussendeur mout kinnen, nee din. En as je t zo nou en din n moal in de gek gooien is ook nait slim. Net zo min as dat je aargens ais n moal de gek mit hebben. Mor paas der veur op dat je n aandermans gek nait worden, omreden din kon t wel ais n aal te grode gekkenboudel worden. En ie waiten ook ja wel: aal te gek is buurmans gek. En veur je der op verdocht binnen is t n gekkenspul en dou je gekkenwaark.
Nou is aal t gek wezen nait slim. Kiek, as je bievubbeld gek binnen op joen LAT-reloatsie, kin joe dat best n goud gevuil geven. Mor bedenk wel: as je de kommende tied bie nkander liggen, hol de vensters din wel goud dicht. Aans kon je wel ais gek worden van de nefies.
Mor goud, ale gekhaid op n stokkie: nog even wat uut eerns en nait uut gekkens. Alles is nog nait verloren. Der is noamelk gain mins zo gek of hai het nog wel n goie trek. Lovve ons doar mor aan vastholden. Das zo gek nog nait.
Tot aankommen moal. Moi hor.
|
