Eltje Doddema.

Om de vattien doage krieg ik bie Dideldom de gelegenhaid om n woord sentroal te stellen. Doar kin ik netuurlek gain haalf waark van moaken. Doarom dit moal t woord 'haalf'.

As t mor haalf kin moak ik ter gain haalfbakken waark van en ik wait dat n goud begun t haalve waark is. k Was dit moal din ook haalf en haalf van plan om der n haalf meter veur uut te trekken. Mor der was gain aine bie Dideldom dij mie doarveur haalfweg kommen wol. Ik wol nog wel n haalf kan jenever inbrengen, mor veur t haalf uur wordt ter bie Dideldom nait dronken en doarnoa al hailendaal nait wuir mie zegd. En das mor goud ook, want haalfkes en motregen dringen deur, nee din? Dus ik heb doarom mor n haalf pond kovvie veursteld. Dat kost wel n poar euro, mor de tied dat je veur n haalf stuver baaltjes kopen konden hevve had.

Nou heb ik zo stoadegaan al zo'n twij en haalf stieg 'haalf'- woorden had. Gekkenmanswaark? Nou, der binnen lu dij zeggen inderdoad dak n haalfwieze bin. t Is meschain zo, mor dat kin je volgens mie beter wezen as n haalve goare, n haalve zole of n haalf male. En as ze zeggen dat je mor haalf gozzel binnen en t is meer as de haalve woarhaid, din wordt t tied dat je meer as haalve moatregeln nemen. Joa toch?

Nou wordt ter van mie verwacht dat ik nait haalfgebekt proat en schrief, omreden ie t din mor haalf volgen kinnen en din sloa ik de plaanke ja haalf mis vanzulf. En ook al moaken twij haalven n haile, ie zellen mie din toch uut moaken veur n haalf zeuven. t Vervelende is dat je dat om haalf twaalf ook nog binnen. En das potjemeel, ie waiten wel, n meelkost dij ze vrouger te eten kregen. Dat stelde nait veul veur, mor ja ook dou gold: beter n haalf aai as n lege dobbe.

Oh, ik kiek even mit n haalf oge op zied noar mien haalve linioal en ik zai dak al wied over mien taks bin. Nou, ik hoop nait dat ie van mainen binnen dat mien biedroage dit moal mor haalf haalf was. Wat mie betreft doarom tot over vattien doage.

Tot aankommen moal. Moi hor.