|
Week 0225
Eer.
t Is slim stoer om t elk noar de zin te doun. Bie paardielu huif je dat ook nait ains te perbaaiern. Bie dij is t nait goud of t deugt nait en doar huif je din gain energie in te stoppen. In dat geval kin je mor beter de eer aan joe zulf holden. Vandoar dit moal t woord 'eer'.
t Eergevuil krigt inderdoad n deuk as der gain eer te behoalen is. En as je aargens gain eer van hebben, kin je doaneg in joen eer aantast worden. Veuraal as aanboden dainsten nait eerd worden. Ach, en wees nou ais eerlek: n Eerzoam mìns zo as ie en ik paast ter toch ook wel veur op dat e nait eerd wordt woar e mit verkeert. Tuurlek, der binnen veul eerleke lu. Lu dij zo eerlek binnen as gold en dij eerlek deur de wereld kommen. Mor ik kin ook aine dij zo eerlek is as Jochems Knelske. Dij stal meel en brocht de zak weerom. Nou, das toch nait slim eerboar, nee din?
Nou kinnen ie vervast ook wel lu dij oneerlek binnen of lu dij te eerzuchteg binnen om van aandern wat aan te nemen. Zoksoort lu kin je beter mor nait in heur eerbulten kommen. Dou ze ook veuraal gain oneerboar veurstel, want eer je der op verdocht binnen is t oremus. En din kin n eertuutje der ook nait veul meer aan doun.
Mor eh... k wil joe tot slot nog even wat eernsachtegs vroagen. Gaiten ie wel ais d'eerappels of? Wat, dat doun allind de manlu? Nou, ik hoop dat ze dat nait allind op n eersten van de moand doun, omreden din konden ze wel ais in n eerliekse riege stoan mouten veur de pot. En ie waiten: dij eerder komt, eerder moalt. Nou ja, in dit geval din wat aans.
Tot aankommen moal. Moi hor.
|
