|
Week 0235
Knippen.
Om d'aandere week krieg ik bie Dideldom de gelegenhaid om joe even tou te "spreken". Nou hoop ik dat ie der elk moal even rusteg veur zitten goan. t Zol toch slim schaande wezen as ie dizze twijwekelkse wieze woorden nait mitkriegen zollen. k Hoop din ook dat ie nait op knipnoagels zitten. Vandoar dit moal t woord 'knippen'.
Ik wait nait hou of t bie joe gaait lu, mor bie mie is t nait aaltied zo dat, zo as t knipt is, t ook naaid worden mout. Ik geef miezulf de neudege ruumte. Op zich is doar ook ja niks mis mit, mor as t knipt en weer knipt, zörg k wel dat ik de knip op de deure dou, om t zo mor ais even te zeggen. Nou overkomt mie t wel ais, dat ter dingen binnen dij mie din nog net op t knipperke lokken. Din gun ik miezulf voak ook wel even n knipperke. n Mins mout ook ja weer energie hebben om d'hege te knippen, nee din? t Zel bie joe wel net zo goan as bie mie: t Waark mout doan worden, aans bin je ja gain knip veur de neuze weerd. Och, en as je din nog tied over hebben, kin je aaltied nog even noar de stille knip goan.
Das netuurlek nait bedould veur t jonkgoud. Dij kin zok beter vernuvern mit n knipseldroake. Alhouwel, ook d'oldern vernuvern zok doar tegenwoordeg mit. Mit nait aal te veul geld in de knip loop je even bie t knipwinkeltje langs en kopen veur nait aal te veul geld wat papier om te verknippen. Wat latjederij aan n kander spiekern en t reseltoat hejje in de knip. Nou wil t wel ais gebeuren dat, as de droake liek in de glinne zunne staait, je geregeld even mit d'ogen knippen mouten. n Zunnebrille wil din nog wel ais helpen. Ie kinnen din ook nog even stiekem knipogen noar joen stille vlam van vrouger. Gain aine dij dat din zugt.
Nou, tied zit ter weer op. Ik hol nou bie de boas van Dideldom even mien knipke op en schenk mie nog even n kop kovvie in. Zunder suker. De tied dat ik de klontjes knipde mit de klontjesknipper ligt al wied achter mie. Kiek, as de boksemboare joe knipt mout je keuzes moaken, nee din?
Tot aankommen moal. Moi hor.
|
