Eltje Doddema.

Dou k van de weke t nijs in t Nijsblad nog ais aan mie veurbie goan luit, vuil mie weer op dat ter elke dag wel melden moakt wuir van geweld. t Liekt wel of repeln en sloagen aan de orde van de dag is. Vandoar dit moal din ook t woord 'sloagen'.

t Woord het in t Grunnegs zowel n positieve as n negatieve betaiken. Om mit t eerste te begunnen: der is niks mis mit as je sloagd binnen veur n eksoamen. De körke kin din van de vlezze of en der kin feest vierd worden.

Mor as aine op joen feest te veul draank achterover slagt, din kommen we al gaauw bie de negatieve kaande van sloagen. Van paardielu wordt din de woordkeus wat roeger en agressiever. Doene lu sloagen der noamelk voak in om as maal Jan maank d'hounder en din kin t al gaauw gebeuren dat n aansproken persoon der ridder sloagen bie staait. t Is din te hopen dat t dij persoon nait in de kop slagt, omreden der op joen feessie zo mor n sloagerij ontstoan kin.

En hebben ie ook wel ais n feest mitmoakt woar noa ofloop bleek dat ain zien slag sloagen haar? En din ie mor n slag sloagen wel of de doader west hebben kon. Ach, volgens mie binnen der veul te veul lu dij deur t leven goan onder t motto van: doen west, sloagerij had, lol had. Schaande lu!

Ie binnen vervast zulf nait zo. Mor wat heur ik joe doar zegggen: Kinnen ie ook zokse lu? Tuurlek, t is ook ja nait slim stoer, dat as je n hond sloagen willen, je vervast wel n stok vinden kinnen, nee din?

Ach lu, as wie toch ais wat voaker noar ons aigen spaigelbeeld keken. Volgens mie is der aan ons ook nog veul te verbetern. En mit dizze konstateren sloag ik volgens mie de spieker op de kop.

Tot aankommen moal. Moi hor.