|
Week 0243
Jan.
Tegenwoordeg is t voak nait meer zo dat n potje noar zien opoe of opa nuimd wordt. Nee, lutje jong hait nait gewoon Derk of Kneles mor Dennis of Kevin. En wel nuimt zien lutje wicht nou nog Martje. Nee, n Jaantje of n Jan wordt sikkom nait meer geboren. Doarom vandoage t woord 'Jan'.
Zo gaauw n lutje potje licht in d'ogen het ligt e al in de luiers en der goan hail wat joaren overhin veurdat mittertied Jan in de boksem komt en e noa verloop van tied boven Jan is. In de tussenliggende joaren krigt e mit Jan en Alleman te moaken. Nou is de aine Jan d'aandere nait. Op school zit e mit olle Jan en jonge Jan in de klazze. En op n dag komt juffrouw mit Jan Huygen in de ton en loater leert e over Jan van Schaffeloar en de jonges van Jan de Witt.
Net as dou hejje nou ook lu dij der in om haauwen as maal Jan maank d'hounder en voak is t bie zok soort lu din ook n grode Janboudel. En doar kinnen Janhoagel en Jan Rap en zien moat din ook voak terechte. Ons soort lu vinden dat netuurlek mor niks, net zo min as je veur maal Jan stoan willen. Nee, n Jan Kloassen, n Jan Salie of n Jan hen wil toch gain aine wezen en je willen al hailendaal gain Jan mit de körde achternoam nuimd worden. Je willen laiver zo gaauw meugelk boven Jan wezen.
Mor ja. Je mouten toch ook veuruut in t leven en elk wait dat as je joe elk moal aargens mit n Jantje van Laaiden van of moaken t slim stoer wordt om ooit ais Jan modoal te worden en das gain redenoatsie van Jan Kalebas. Kiek, Jan mit de pet bin je gaauw genog mor wil je wat wieder in t leven as Janman in t pepieren huuske din mout je voak hail wat swaitdruppen valen loaten.
Traauwens, je mouten wel oppazen dat je nait aargens veur Jandoedel bie te stoan kommen. En geef ook acht om der nait as Jan Joker bie te zitten Ook mout je der veur zörgen dat ze joe nait Jan zachies of Jan piepke nuimen goan. Int leste geval konden joe de longen din wel ais goud routeg worden. Nee, beter is t om in dat geval der as Jan van Verren bie stoan te goan. Neem laiver mor n Jan Hoagel of moak desnoods Jan in de zak. Mor paas wel op t gewicht want veur je der op verdocht binnen bin je n Jan povverd. Zeker is dat zunder smoken Jan Splinter wel gezonder de winter deur komt.
Tot aankommen moal. Moi hor.
|
