|
Week 0246
Haals.
As je net as ik van de weke t nijs volgd hebben din is t joe vervast ook wel opvalen dat t stoef bie en wat wieder vot weer niks aans was as repeln en sloagen en doarbie binnen ook weer verschaaiden lu om haals brocht. Vandoar dit moal t woord 'haals'.
Om even op dat nijs weeromme te kommen: mennegain schut dat in t verkeerde haalsgat. As je der din ook nog beelden bie zain din krieg je asmis n kloede veur d'haals. Zulfs zo slim dat, as je net aan t eten binnen, je niks meer deur d'haals kriegen kinnen. n Minne boudel, lu. Joe zollen der hoast n haalszoak van moaken, nee din?
Mor dat gebeurt vervast nait, omreden veul lu hebben t te drok mit zokzulf en dat binnen nait allind dij dij tot d'haals uut roeken. Nee, as je der zulf tot d'haals tou inzitten, in de schulden bieveurbeeld, din zit joe d'haals nait zo gaauw dicht van n aander zien ellinde.
Nou is t de vroage of ie der op zitten te wachten dat ik joe dit aan d'haals hang. Meschain hangt t joe wel tot d'haals uut. Dat kin, mor ik zit joe in elks geval d'haals nait vol te laigen.
Mor goud, ik stop nou, omreden d'haals wordt mie dreuge.
Tot aankommen moal. Moi hor.
|
