|
Week 0248
Pot.
Van de weke las ik in de verschillende kraanten over veul lu slechte dingen. Dij haren der dus dudelk n potje van moakt. Redens genog om t vandoage ais te hebben over t woord 'pot'.
Nou hoop ik nait dat ie zo doof binnen as n pot, omreden ie din veul nijs nait mitkriegen. As dat wel zo is, din haren ie niks van dat nijs mitkregen en din haar de nijslezer net zo goud de pot op goan kind. Ach ie waiten t ook ja wel: lutje potjes hebben ook oren, dus ik neem aan dat ie t op d'ain of aandere wieze wel mitkregen hebben. Boetendes, der is gain pot zo schaif of der paast wel n deksel op.
Ook op de pot dij je verteren kinnen. Of hebben ie nait zo'n pot en leven ie bie de dag? Hou t ook is, volgens mie is t aal ain pot nat. Of toch ook weer nait? As de pot goud vol zit kin je joe meer permeteren as dat de bodem zichtboar is, das woar. Din huif je smiddags om 12 uur gain potjebuul eten. Toch mouten ie vervast voak eten wat de pot schaft en t binnen vervast nait aaltied vleespotten van Egypte.
Mor goud, ook al is elk mins nait geliek in zien doun en loaten, wie mouten as t kin toch aalmoal in ain potje pizzen. Din is der de minste hikhakkerij en din huiven wie de pot nait verwieten dat de kedel swaart zucht. Ook nait dij potjepazer dij nooit wat leerd het, nee din?
Traauwens, Hinderk en Geertje hebben lestdoags n pòtje kregen, eh.. of wast nou n potje. Nou, dat zal k nog even noakieken mouten in t Bokkeblad.
Tot aankommen moal. Moi hor.
|
