Eltje Doddema.

Vaalt t joe ook op dat lu zowel in woord as in geboar voak maal uut d'houke kommen kinnen? "Doar heur ik nait bie," zeggen ie? Ik leuf joe votdoadelk lu, mor ik denk dat t mor goud is dat aal joen gedachten joe nait veur de kop schreven stoan. Doarom dit moal t woord 'kop'.

Nou ik ainmoal d'kop deur d'helster heb, waiten ie nog nait wat joe boven de kop hangt, mor ik beloof joe dak joe de kop nait gek moaken zal. Dat doun vervast aandern wel en din kin je dij t wel op de kop geven. Ik wil in elks geval nait op mien gewaiten hebben dat joe deur mien toudoun de kop kloeteg wordt, omreden lu dij nogal kört van kop binnen din de kop glìnne wordt. En dat mout we veuraal nait hebben, nee din?

Boetendes binnen der al lu genog dij zok over de kop aarbaaiden. Dij zitten din ook voak mit de kop tussen de bainen en doun niks as moalen en kopschraben. De kop lopt heur doarbie om en ze zitten doarom din ook tot de kop in d'ellìnde. n Male boudel as t joe t doarbie ook nog ais in de kop slagt.

Nee, din kin je zo nou en din beter mor aine mit n kwoaie kop wat veur de kop knappen. Dat lucht op en joe loaten joe din nait aal op de kop schieten. En as je dat fesounlek doun din huif je joe ook nait d'ogen tot de kop uut te schoamen. En of ie nou n kop as n bol, n kop as n boeskool of n kop as n aalmenak hebben, vast staait dat, woar je zulf nait kommen, joe de kop nait wossen wordt. En mit dizze beweren sloag ik de spieker op de kop.

En din is t nou tied veur n aandere kop: veur n kop kovvie. Dij zörgt r veur dat je de kop ter bieholden kinnen. En das n kopzörge minder.

Tot aankommen moal. Moi hor.