|
Week 0302
Tied.
t Komt mie nog veur as de dag van guster: d'oljoarsoavend van 2002. t Is nou n dik joar leden, mor t komt mie veur as de dag van eerguster. En noasmoak van d'euliebollen, dij de vraauwlu van de ploatselke knienefokveraainen bakt hebben veur d'oljoarsdag van 2003, haar ik din ook alweer in de mond veurdak ter op verdocht was. Tied vlogt, vandoar ditmoal t woord 'tied'.
Gezain de grode belangstellen veur erotische programma's op de televizie zeg ik ter even bie dat de leste letter van t woord n 'd' is. Ale lu dij d'ofgelopen joar uut tied kommen binnen hebben hier netuurlek niksmeer aan, mor ja, ie hebben t ja nog wel even aan tied, nee din?
Alhouwel: mainste lu dij ik tegen kom hebben gain tied. Dij joagen en boundern as gekken deur de tied. Kiek, dat boeren tiedkörteg binnen as t heu op t laand ligt kin k mie nog wel veurstellen, mor dat ons soort lu zok gain tied gunnen veur mekoar en aandern, is slim zörgelk. Ik wait wel: tied wacht ons nait, mor de tied mout joe nait de boas worden. Joe mouten voaker ais de tied nemen veur ontspannen. Das veul gezonder as aal achter de tied aan bozzeln.
Eertieds zeden ze, as ze aargens laank op wachten mozzen: dat is tiedverdrief bie de worstkedel. Nou, dat liekt mie wel wat, lu. Tied nemen, bainen op toavel, n borreltje der bie en of en tou stokje metworst. Körtom: nait op tied stoan.
Wat, ie hebben dat ook aaltied al geern doun wild? Nou wat let joe. Doun lu, nait wachten, aans bin je weer te loat en ie waiten ja wel: Noatied is achterof en achterof kin je n oabe in de kont kieken en das nait zo'n schiere uutkiek, zeg nou zulf.
Nou zeggen ie netuurlek dat ie der in t vervolg veurtied aan denken zellen? Och, t is de tied van de veurnemens. Dus, dou joen best. Mor bedenk wel: joe wat veurnemen is makkelk zat, mor om vol te holden, das aanders wat. Hou t ook gaait: de tied zal t leren.
Tot aankommen moal. Moi hor.
|
