|
Week 0304
Bainen.
As ie dit lezen, kinnen ie nait zain of k vanmörgen wel of nait mit t verkeerde bain tou berre uut stapt bin. Nou, ik kin joe vertellen: ik bin best te spreken en ik zal veur joe din ook mien beste bain veurzetten deur t over t woord 'bainen' te hebben.
Nou binnen der vervast wel Dideldommers dij t, as ter op aan komt, zo of en tou in de bainen zakt. Das n maal gevuil kin k joe vertellen. Ie kriegen t aine bain din nait meer veur t aandere en ie zitten al gaauw mit tonen in d'aaske. n Swieneboudel is dat. Boetendes is t n male boudel as je gain bain meer aan de grond kriegen. Joe vuilen joe wat zweverg en hopen din ook dat je zo gaauw meugelk weer de bainen onder t lief hebben zellen. Das wel zo standvasteg en t liggoam vuilt zok doar meroakel bie. Gezondhaid gaait toch boven alles. Nee din?
En om in t leven wieder te kommen mout je wel goud fit wezen, as veurkommen willen dat aine joe bie t bain nemt. En dat vaalt asmis nait tou vandoag de dag. Der binnen veul miesgasters dij joe perbaaiern zo nou en din baintje te lichten en veur je der op verdocht binnen zit je mit ain bain in ain hoos: ie kinnen gain kaande meer uut. Ie kriegen de bainen nooit weer goud onder t gat en das n roare gewoarworden.
Nee, t leven zit vol gevoaren en as je doar te laank bie stil stoan hejje kaans dat joe t binnen de körtste keren in de bainen zakt. En as joe t ooit lokt om de bainen der toch weer onder te kriegen, blief aandere lu din of. Schop din gainent tegen t zere bain aan. Dat doun der al zoveul. En op dat aine gezonde bain dij der din nog over blift kin ja gain mins lopen.
Tot aankommen moal. Moi hor.
|
