Eltje Doddema.

Der binnen lu dij woorden zo schier in n bepoalde volgorde zetten kinnen, dat je de ontstoane tekst mit plezaaier lezen. Ik kin mie veurstellen dat ie joe ook wel ais ofvroagen: Hou kommen ze der op, hou doun ze t. Vandoar dit moal t woord 'doun'.

Nou waiten ie vervast ook wel dat 'doun' in t Hollands 'doen' is. Mor ja 'doen' is bie ons weer gain 'doun' en das n stoere boudel. En toch, mit ain dij doen is, is mainsttied wel wat te doun. Zo aine kin joe hail wat te doun moaken, omreden draank kin hail wat mit aine doun. En as de draank in de man is, kin je mit zo aine beter mor gain gedounde hebben. Ie mouten joe toch ook glad schoamen as draanksteerns in joen gezelschop roare uutdrokkens doun. Of dat ze t onder joen ogen doun mit aandere vraauwlu. Nee, doar kin n fersounlek mins zo as ie en ik, toch ainglieks nait aan mit doun. Wie doun zokswat gewoon nait.

Ach en wees nou toch ais eerlek, lu: das toch ook gain doun geliek. Wat? t Is gewoon gain menaaier van doun. En boetendes, ain kin joe ook ja wel wat doun. En doar zit gain mins op te wachten.

As ie nou mien road doun, loaten ie draank zo veul meugelk stoan. Kiek, ie huiven mie doarveur gain belofte te doun, mor ie doun der goud aan joe zulf dij bepaarken op te leggen. d'Ain mout ter wat meer muite veur doun as d'aander, vanzulf. Das dudelk. Mor ie huiven toch nait dij noa te doun, dij nait veur aandern onder doun willen. Doar huiven ie nait aan mit doun.

Nou, t zel mie nij doun. Ik hol de kommende tied de plietsie berichten in de goaten. Ie waiten in elks geval wat joe te doun staait.
Doun lu, omreden doun is n ding. En ie waiten, t is mie der om te doun dat ie overaal en naargens persoonlek dounde binnen mit de draankproblematiek. Dat mouten ie nait deur aandern doun loaten. En mit dizze leste woorden kinnen ie vervast wel wat doun.

Tot aankommen moal. Moi hor.