Eltje Doddema.

t Schient dat tegenwoordeg de jeugd zok boetendeure mor slim stoer vernuvern kin zunder overlast te bezörgen of de boudel te verhinneweren. Uutzunderns doargeloaten netuurlek. Ze klontern uut vervelen bie nkander op n zogenoamde hangstee. Vandoar vandoage t woord 'stee'.

t Jonkgoud het op n gegeven mement nait meer genog aan t olderliek stee vanzulf. Ze verloaten t haimstee en ook voak heur woonstee en trekken der op uut om heur aigen stee in de wereld te vinden. En veur ze n goud stee vonden hebben, z'alles op stee hebben en alles op stee stoan hebben goan der hail wat joaren veurbie.

Voak zit t heur vot ook nog laank nait op ain stee. t Is heur nait noar de zin dus. En ook zit n ongelok op n lutje stee en boetendes elk is ook ja nait geliek. Zo binnen der gounent dij heur stee nait waiten. Din hejje de lu dij zulf niks uut stee zetten kinnen of heur aigen rommel nooit uut stee moaken, dus nooit ais n moal wat op t aigenste stee weeromme leggen. Ook binnen der gounent woar of t geld nait op stee komt. Zoksen kinnen din wel de mond op t rechte stee hebben, mor as je aaltied aine in t stee zitten loaten, dus steevast de beloftes nait holden, din komt ter niks van terechte.

Joa lu, der komt hail wat bie kieken veur je n schier stee vonden hebben. Ach, en wat is schier. n Olle kwinne mit n bedstee is veur paardielu t stee woar ze old worden willen. Ze vuilen zok doar op heur stee en t is veur heur gain maal stee.

Dat is n liekstee wel. Wat veur n stee dat is? Nou gewoon n delle, n littaiken. Gelokkeg is dat mainsttied gain zeer stee mor t is voak aans as n stee woar je mit geboren binnen. Ie waiten t wel ja: op joen olderliek stee. Och, en doar hejje en hol je toch voak n swak stee veur. Ook t jonkgoud van tegenwoordeg. Ook al geld netuurlek: opstoan, stee vergoan.

Tot aankommen moal. Moi hor.