|
Week 0312
Groot.
Vrouger ston der in elke stroade wel n krudenierswinkeltje woar of je joen rokerij, joen aandere doagliekse bosschoppen of, wat veuraal kinder deden, joen baaltjes kopen konden. t Mor tegenwoordeg mouten de winkels aal groter. Doarom dit moal over t woord 'groot'.
Paardielu binnen drok op jacht noar t grode geld. En de snelste menaaier is om din in t groot te handeln. Ze zetten as t woare t grootzaail op. En das nait allind grodelu'smode. Nee, in alle rangen en standen in onze moatschappij gaait t om n groten of om n bloten. t Wordt veul of niks dus. As t even kin willen ze der zo gaauw meugelk groot van leven, terwiel elk wel wait dat, wel t klaaine nait eerd, t grode nait weerd is. En dat maggen ie best aan de grode klokke hangen.
Nou is groot netuurlek nait aaltied verkeerd. Der is niks mis mit as je groot worden en op n duur groot binnen. Doar kinnen de mainsten van ons best wel groots op wezen. En t is ook hailendaal nait slim as je groot aan binnen; as je aan de grode kaande binnen dus. Lu worden nou ainmoal groter as vrouger. En as je din ook nog ais n groot haard hebben, din mag je wat mie betreft tot de groten rekend worden.
Minder is t as je din op zien grootmans proaten goan en de grode man uuthangen willen. En t is wel aldernoarste slim as je as rasechte Grunneger ook nog groots proaten goan. En as je din ook nog n groot woord hebben, of zulfs n grode bek, din bin je al gaauw n groothans en n grootsnoede. Meschain ook nog wel aine mit grootsproak. Kiek, ie kinnen wel groot aan willen en n haile groothaid wezen willen, mor as je, hou groot je ook binnen, noast joen Grunneger potje pizzen, din gaait onze streektoal wel noar zien grootje. En dat kin mie slim begroten. Zulfs zo slim dat mie t eten der groot van in de mond wordt.
Tot aankommen moal. Moi hor.
|
