|
Week 0314
Oor.
Der is n klaaine kaans dat je bie t lezen hiervan nog op ain oor liggen. Reden doarveur kin meschain wezen, dat t guster nogal loat worden is en dat je mit n beste snee in t oor thuus kommen binnen. Vandoar ditmoal t woord 'oor'.
Meschain waren ie wel op n bruloft en toeten joe d'oren nou nog van de weer veuls te haarde meziek. Doarom waren der op dat feest netuurlek ook aalmoal lu mit gezichten as oortieken. Joa lu, dat krieg je, as deur de desibellen joe d'oren van de kop reten worden.
Of hejje gusteroavend meschain veziede had, lu dij joe d'oren van de kop vreten hebben. Dij gingen netuurlek veuls te loat vot. Dou joe zeden dat ie d'aanderdoags vroug op mozzen, haren zai doar gain oren noar. Joe konnen ze dou vervast wel n draai om d'oren geven, mor doar luiten ie joen oren weer nait noar hangen. Wat r in t leste zegd is wait je vervast nait meer, omreden t ging t aine oor in en t aandere weer uut. De zin om te luustern was joe glad vergoan.
Of waren ie tot over d'oren tou verlaifd en is t doarom loat worden. Lu dij nog nait dreuge achter d'oren binnen zagen bie heur thuuskomst d'ol lu mit staaile oren op heur ofkommen. n Male boudel, omreden zai haren joe nog zo in d'oren knupt dat t nait te loat worden mog. Mor ja, lutje potjes hebben din wel oren, mor loaten zok zomor gain oor aannaaien. As t schier gaait en je d'oren nait dicht aan de kop hebben, din oordail je voak zulf, nee din?
Wat d'oorzoak ook west is lu, ik hoop dat t op dit mement in elks geval goud zit tussen joen oren. Din hebben ie, deur dit haardop te lezen en noar joezulf te luustern, joen oor in elks geval te luuster leggen kind bie joezulf en hebben ie joen veurdail doarmit doun kind.
En of je nou aan d'oren tou in t geld zitten of t achter d'oren hebben; as t goud is is t leste oordail aaltied aan joe.
Tot aankommen moal. Moi hor.
|
