|
Week 0316
Dik.
Ik wait nait of ie joe doar ook wel ais aan bezundegen lu, mor ik luuster wel ais noar n belpergram op de radio. Woar lu zok toch nait aal dik om moaken, t is nait te leuven.
Vandoar dit moal t woord 'dik'.
t Zal joe ook opvalen dat, as je om joe tou heuren, t r dik in zit dat je voak lu heuren dij de dikste drokte moaken kinnen om n schietscheterghaid. En as je der acht op geven din is t net of der nait veul dikhoeden meer rondlopen. Of t nou n dikke moeke, n dikke barries, n dikke boer, n dikke vreterd, n dikkop of n dikschieter is, elk schient zok tegenwoordeg dik te moaken, terwiel dat dun in de mode is. En mit Poaske is dik schaiten bie t riestern toch ook nait zo geweldeg. Dat kost joe geld of neuten vanzulf. Nee, din binnen beter of as ie dik en dun schaiten.
Mor wees nou toch ais eerlek lu: t zit r dik in dat ie vrouger n dikke deugnait west binnen. En meschain bin je gusteroavend wel dik aan de swier west en bin je dik doen op nust kommen. Nou ik hoop din, dat je zulf t stuurrad nait in d'handen had hebben, want doar bin k dik op tegen. Ik hoop aaltied dat zokse lu pakt worden en n dikke bekeuren kriegen. Zok soort lu kriegen van mie din ook n haile dikke min. Lu dij mit draank op achter t stuur kroepen heuren n zetje bie n dikschieterliere in t hok te zitten. En doar kin je nait lekker dikkedakken. Meschain n bordje dreuge dikke ries of zokswat. En meer komt heur ook ja nait tou. Nee, doar hebben ze t vervast nait dik op t zin.
Ik zal joe doar wieder gain dikke stokken over vertellen, omreden aans dij Diksteerten uut Onstwedde d'oareghaid der meschain wel dik of kriegen en din lezen ze nait wieder. Ze worden din nait gewoar van t volgende mysterie:
Wos je lu, dat 'dik' van vraauwlu manlu moakt? Hou of dat din wel meugelk is, wollen ie waiten? Nou, let op. De vraauw en ik waren gusteroaven mit 150 man dik op n bruloft.
Tot aankommen moal. Moi hor.
|
