Eltje Doddema.

Der binnen mementen in t leven dat t nait zo goud akkedaaiert mit n kander. Der is wat voaker hikhakkerij as aans en din bin je der mainsttied nog wel even schier mit om de kroezen weer glad te strieken. Vandoar dit moal t woord 'schier'.

Smoaken verschillen en wat d'ain schier vindt, staait d'aander tegen. Nou kin t ook wezen dat, woar d'ain schier mit liekt, dat bie d'aander liekt as n haspel op n mouspot. Toch willen de mainste lu der wel geern schier bie lopen, schier in de klaaier zeg mor.

In de regel is t zo dat, as de moeke zindelk is, de kinder schier binnen. Ze zain der din mainsttied schier uut en kommen schier veur de dag. De boudel in huus is ook schier en ze zitten ook schier in t raive. Ach, ainglieks is alles op schier. Körtom: n schiere huusholden woar t meer as schierschoon is.

Minder is t as de boudel schier en schoon op is en as t ter in huus ook mor net even schier is. Lu hebben din al gaauw gain schiere boksem meer om de kont en ze binnen ook nait schier om d'ogen.

Mor gelokkeg kommen de mainste lu der schier langs. Zo binnen der ook lu dij schier laai moakt hebben en n schiere boudel hebben: gain hieptaik dus. Ook binnen der gounent dij t aal op t schierste hebben willen. Dij drinken din ook vervast gain kovvie van schier sokkeraai. Nee, dij reserveren zo of en tou n midweekje Schiermonnikoog en kopen schiere sieroaden van schier gold. Woar ze schier zin aan hebben doun ze gewoon. Dij waiten din ook persies woar de schieroal kropt.

Bedenk: wil je der mit n kander schier langs kommen, din is t n kwestie van geven en nemen. Schiermiddeln zo as wie dat nuimen. t Kost aigenlieks schier niks allind je binnen der joen haile leven schier mit. Mor as t joe lokt kin je der geregeld n schiere op nemen. Krek, n borrel, n heldere.

Nou ik hoop dak t ter dit moal weer schier van ofbrocht heb. Aan t schiere weer van de leste doagen het t in elks geval nait legen.

Tot aankommen moal. Moi hor.