|
Week 0320
Deur.
k Wait nait hou of joe t vergaait, mor n weke het asmis veur mie doagen te min. t Is zulfs zo slim dat, as ik denk dat t guster dinsdag was, t mörgen al weer zotterdag is. Tied vlogt mie deur d'handen hin. Vandoar dit moal t woord 'deur'.
Om vot mor even mit deur in huus te valen: t gaait ter netuurlek mit deur dat je gewoon deuraarbaiden. Ik heb mie der van de weke ook weer schier deurkloard. As je mor n stòk achter deur hebben, lokt t voak ook wel.
Mor je mouten joen tied nait verpoedeln, dus nait te veul bie aandern deur platlopen of zulfs aine deur uut d'hingen lopen. Din kom je vervast nait deur t waark hin. Boetendes, je zellen toch ook deur de tied mouten, omreden zo dag en deur levert omdiedeldaantjen mainsttied gain geld op.
Nou kin n aander joe wel deur de tied helpen, mor of je doar nou deur in gelokkeg van worden vroag ik mie of. En zeg nou zulf lu: as joen partner nou deur alles hin loi wezen zol, zollen ie hom of heur din nait t gat van deur wiezen? Nou, as zo aine bie mie d'achterdeur in kommen zol, zol dij der deur veurdeur weer uutbonzjoerd worden. Veur zo aine zol ik mien ainegste appel nait deursnieden. Nee, dij zol mie de drumpel nait meer tou deur uut lopen.
Goud, veur dat t zo wied is zel ter wel even aan toeten tou deur goan, mor kerdoat optreden gaait ter volgens mie in zoksoort gevallen mit deur. Nou zel je der in t begun wel even deurhin zitten, mor bedenk: t leven gaait ter gelieke goud om deur. Ie mouten even deurpakken. Veuraal as joen vraauw n deurslag mit grode goaten is. Mor bedink, n deurslag is beter as deurgang.
k Hol der nou mor mit op, veurdak hailendaal deursloag.
Tot aankommen moal. Moi hor.
|
