Eltje Doddema.

Wie Grunnegers binnen aaltied wat veurzichteg om ons aal te positief te uten. n Antwoord as: t haar minder kind heur je voak as aine vroagd wordt hou of t is of hou of t ter heer gaait. Vandoar dit moal t woord 'heer'.

Woar of ie ook heer kommen lu, t is overaal al joaren heerwoarts zo, dat t doar nou hail aans heer gaait as dou. Alhouwel, as t veur d'heren komt, din kom je tot de konkluzie dat ook nou nog voak geldt: zo heer, zo knecht. En as dij baaide heer en meester wezen willen din gaait t ter vervast wel ais heer, omreden ze loaten nait tou dat d'ain over d'aander heer zit. Das nou zo en das al joaren heer zo. Net zo as dat je nait meer as ain heer dainen kinnen. Wil je joen waark noamelk goud doun, din zel je der goud achter heer zitten mouten. t Kin noamelk nait zo wezen dat je nait waiten van woarhin of woarheer.

Kiek, dat je n heer in t verkeer binnen is hail wat aans. Dat wil nait zeggen dat je der heerachteg uutzain mouten of dat je n heerboer wezen mouten. Nee, mien ol heer zee aaltied dat, as je heerlek ontspannen aan t verkeer dailnamen, je ook gain agressie kregen. Hai ree dou din nog wel op n herenfietse, mor toch. Der is sinds dij tied netuurlek wel hail wat veraanderd.

Toch gaait nait alles op n hobbel. Wie kloaverjazzen nog aaltied net zo as veur joaren heer en vraauw en heer van troef nuimen wie nog aaltied stok. En das nog aal twinteg roem. Ach, en n heerlek gloaske wien op zien tied smoakt ook nog aal meroakel. En ik bin nog aaltied nait slim heernachteg en ook nait heerachteg. En dat zel k ook nooit worden ook.

Nou, ik hol der weer mit op. Boetendes, der gaait mie ook net n heertuutje op d'aarm zitten. Dij breng k even noar boeten tou. Doar zet ik hom noast n heerdaimke in t gras. Wel wait komt ter wel n tuutdaimke uut voort. In dizze tied wait je t mor nooit hou of t ter heer gaait in de netuur.

Tot aankommen moal. Moi hor.