|
Week 0326
Krom.
De jeugd van tegenwoordeg vernuvert zok nait meer mit spultjes van vrouger. In onze digitoale moatschappij wordt r drok SMS-ed en chat achter de kompjoeter. De tied dat je aan t tiepeln waren of kromstoan mozzen bie okkerdebok mit hoameveren ligt al weer wied achter ons. Dit moal ook t woord 'krom'.
Hail wat olders hebben krom legen om heur kinder leren te loaten. Ook hebben ze zok in allerhaande kromtes wrongen om heur kinder veuruut te helpen. Dat was nait aaltied mit evenveul sukses. Der binnen noazoaten bie dij hail wat kromsprongen moakt hebben of dij kromvingerd deur t leven goan binnen, nait t verschil kinnend tussen mienent en dienent. Ook waren der gounent dij goud in de goaten haren dat t geld dat stom is recht moakt wat krom is.
Nou was t vrouger zo dat aine dij kromme vingers haar te moaken kreeg mit de beule en zien kromstoald bieltje. t Slachtoffer, de doader dus, kon din perbaaiern recht te proaten wat krom was, t holp mainsttied nait. Veuraal as bie de beule de broodkrommels begonnen te steken.. Der was din gain holden meer aan. Noa de fatoale slag kon t slachtoffer krommeneren over zien inkomplede pokkel. Dat kin je traauwens ook as je lieken op t kromjong van de Notre Dame, of zo krom binnen as n houpel of zo liek binnen as n kromstòk.
Zo'n kromstòk was n kromme stòk, woaraan t geslachte swien aan de ladder hongen wuir. Dat gebeurde bievubbeld ook bie de krombekken uut Leerms. Doar haren ze, net as overaal in de pervinzie, ook hoanen dij aaier legden mit kromme hoaken en doar gingen ze ook wel ais kromrad lopen. Ze luipen din mit heur handen en bainen ziedelings om beurten op de grond. Dat was nog ais wat aans as dat SMS-en en chatten van nou.
Traauwens, mocht je veur dat chatten en ook t e-mailen nog n kompjoetertoavel moaken willen, paas din op dat ter gain Kromme Jurrie in joen knuterwaark komt. Alhouwel: n Goud pad krom is nait hìn-om. Of is dat in dit verband n kromme redeneren?
Hou t ook is, ik wins joe in elks geval n goie en veuraal gezonde vekaansie. Kom nait krom weerom!
Nou ja, ie zellen vervast wel al krom liggen van t laggen over zoveul onneuzelhaid. Ik moak ik ter mor n inde aan.
Tot aankommen moal. Moi hor.
|
