|
Week 0335
Hoas.
t Jonkgoud van tegenwoordeg venuvert zok nait meer, zo as wie vrouger, mit siddeln en tiepeln. Ze speulen al hailendaal nait meer okkerdebok mit hoaneveren. En as wie vroagen of ze wel ais heurd hebben van hoaskeriepen din kieken ze votdoadelk op heur Pokémonkoartjes om te kieken of dij der meschain ook bie is. En omdat r aaltied veul honden om d'hoaze binnen dit moal t woord 'hoas'.
Tieden veraandern, das niks nijs. Op Westerwolde wordt vervast gain hoashondjen meer speuld, alhouwel doar vervast lu binnen dij zo of en tou nog wel ais male hoazesprongen moaken. Kinder binnen vervast nog wel ais aan t hoaskejoagen, ook al hait dat nou nait meer zo.
Mor net as vrouger binnen der nog aal hoasjoagers, dij in t veld mit heur hoazewindhonden achter n hoazespoor aan op jacht goan. t Is te hopen dat dij honden der zin in hebben, omreden mit onwillege honden is t kwoad hoazen vangen. Nou is n hoaze nait zo troag as dikke stront in n trechter. Dij kin uut zokzulf al lopen as n hoaze en huft zok doarom gain hoazevet achter d'hakken te klaaien veurdat e der as n hoaze vandeur gaait. Nee, dij het al hoashoar aan d'hakken en kaist zo zundermeer t hoazepad. Zodounde kin menneg joager, mit of zunder hoazelibbe, n haaidehoaze of n zandhoaze nait aan d'hakken kommen.
Mor n loze joager wait dat n hoaze weerom komt doar woar e geboren is. Zo kin e onder n hoasneutboom in de buurt even zitten goan te wachten. Desnoods slept e in tied even as n hoaze, mor hai dut ter verstandeg aan om zokzulf nait te trakteren op hoazebloud, omreden t din vervast niks wordt mit zien hoazebroa. Alhouwel, ie waiten nooit hou n kou, of in dit geval dij joager, n hoaze vangt.
Mor goud, ik hol der mit op. Ik mout nog even in toene. Dij zit onder t hoazebrood en dat mout r uut. Doarnoa heb k vervast nog wel even tied veur n hoazesloapke. Mor nait te laank, omreden k bin nuigd veur n etentje. t Wotter lopt mie nou al in de mond as ik aan n lapke swienehoas of ozzehoas denk. k Kin der hoas(t) nait op wachten.
Tot aankommen moal. Moi hor.
|
