|
Week 0337
Aal.
Hebben ie dat ook lu, dat, as ie t nijs op televizie of van t hoofdblad van de kraande onder d'ogen kriegen, bie joe din de gedachte opkomt: t Is ain ellinde, aal ellinde? Wat je toch nait aal te zain, te lezen en te heuren kriegen. Vandoar aandacht veur t woord 'aal'.
t Liekt wel of t nijs wat dat betreft aal doage t zulfde is. t Gevolg is din ook dat je der aal aan wìnd binnen. Je kieken der in t leste nait meer van op en das aalderdeegs slim zörgelk. Je worden as t woare immuun veur aal dij beelden dij joe veurschuddeld worden. En aal noar gelang joen gemoud, wor je der nait meer hait of kold bie.
Aalhouwel: aalgedureg schrik je even op, ie binnen aalderdeegs n inkeld moal van streek. Veuraal ast aal te dicht bie komt. Mor de mementen dat je van schrik en aalternoatsie gain woord meer uutbrengen kinnen worden aal meer betuun.
"t Zal aal wel woar wezen," zeggen ie. Wat? Heur ik doar wat onverschil uut? Vast aal. Of bie joe nait. Hou t ook is, t is aal wat tussen de minsen onderling. Nou binnen der aaltied lu dounde om te perbaaiern t weer in odder te moaken. Voak is t wat dat betreft aal muite veur niks west. En ie waiten ja wel: aals te goud is aandermans gek. t Is en blift onder n kander voak ain en aal hikhakkerij of nog slimmer.
t Kin wezen dat t bie joe aal rozegeur en moaneschien is. Meroakel lu. Dou joen best om t zo te holden, omreden joe huiven gain Maal Aalbert te wezen of ze aal zeuven nait meer te hebben om t ooit ains over joe hin te kriegen. In t aalgemain is t zo dat meleur elk overkommen kin. Ook al heb je n kop as n aalmenak, bin je n aalbegeer of n aalbestel. En ook in materiële zin kin t aal tegen zitten, omreden aal holt is gain timmerholt.
Ain ding is wizze. Je hebben aal nait in d'haand en in n leven kin aal mit of aal tegen zitten. Hopelk vaalt aal tou.
Tot aankommen moal. Moi hor.
|
