Eltje Doddema.

Zo as ie zain is mien biedroage weer schier bie Dideldom kommen om t mit joe over n bepoald woord te hebben. Nou binnen der gelokkeg woorden zat, mor ik mout r elk moal weer perbaaiern uut zain te kommen om n zinvol verhoaltje te moaken. Doarom dit moal t woord 'kommen' en aal wat doarbie heurt.

As je de kraanten n beetje volgd hebben din is t joe vervast opvalen dat r van de weke schaande genog weer n aantal luusteroars minder kommen binnen. Der binnen noamelk hail wat lu uut tied kommen. Nou heurt dat minder slim dan wenneer je om haals kommen of om haals brocht binnen, mor bie baaide kom je nooit weer uut joen woorden.

Nou wait ik ook wel: t komt zo as t komt, mor t komt r op aan dat je de bainen onder t lief holden. Dat vaalt asmis nait tou mor ie waiten: komt tied komt road. En as je der vandoage nait tou kommen, din mörgen mor. t Waark blift ja wel in de wereld, nee din? As t mor nait tot ofstel komt.

Nou binnen aal minsen nait geliek, gelokkeg mor. Bie paardielu komt t voak nait zo krek en dij zai je din ook laiver goan as kommen. Mor der binnen ook lu dij laiver bie de liggende vreters binnen as dat ze wat uut stro zetten. Zok soort lu kinnen naargens tou kommen en in heur leven is t din ook aaltied komkommertied.

En din dij lu woarbie t nooit komt as t vandoage nait komt. As t aan dij legen haar was dizze rubriek der nooit kommen, omreden der was nooit aine opkommen. En nou mor wachten of je der ooit weer ofkommen.

Wat mie betreft: in elks geval tot aankommen moal.

Tot aankommen moal. Moi hor.