|
Week 0343
Haand.
Doaglieks heur ik de sirenes van brandweer, plietsie en/of zaikenwoagen angstaanjoagend verkondegen dat r weer wat gebeurd is. Ongelokken en rampen zitten in n lutje hörntje en je maggen joen handen wel dichtkniepen as je de weke weer ongeschonden deur kommen binnen. Loat wie t doarom ais hebben over t woord "haand".
t Ligt veur d'haand dat, as joe der wat overkomt, je mit d'handen in t hoar zitten. As je dat teminnend nog kinnen. Joe hopen in dat geval dat je weer vlot aan de beternde haand binnen. Je kinnen din ook zulf weer d'handen uut de maauwen steken en zo hier en doar de helpende haand baiden.
Aans is t netuurlek as ie joen handen zoaleghaid beloofd hebben en joen handen veur hulpverlainen nait omdraaien willen. Der binnen lu dij doar n haandje van hebben. Mor meschain stonden joen handen der ook wel nait noar en hol je d'handen op de buutsen tot aan d'elbogen tou, omreden t haandjet joe nait. Mor der binnen gelokkeg ook lu dij heur d'handen wel wappern loaten. Dij kin je mor beter d'haand boven de kop holden en op handen droagen.
As t zo uut komt kin je ook aine onder d'handen nemen, veuraal as joe d'handen jeuken. Nou mout je doar gain gewoonte van moaken vanzulf. d'Agressie nemt sowiezo haand over haand tou en joe kinnen doar d'handen toch mor beter van oftrekken. Lang mekoar n moal voaker d'haand zol k zeggen en besef dat je iezer nait mit handen breken kinnen. Striek wat voaker mit d'haand over t haart. Din lopt ter ook nait meer zoveul uut d'haand. Mit verstand binnen veul perblemen in n haandomdraai oplöst. En boetendes: Je kinnen mekoar toch ook veul beter op handen droagen as ain om handen lopen, nee din?
En as je nou es n moal niks om handen hebben: loat kinnen stoan en dou t mit d'handen. Je kinnen beter wat aan d'haand hebben as dat je aan handen en vouten bonden binnen.
Tot aankommen moal. Din is der vast wel weer wat op handen.
Moi hor.
|
