|
Week 0345
Kolle.
t Zugt r weer noar uut dat t van t joar weer n gruine Midwinter wordt. Of t din ook n widde Poaske wordt is netuurlek nait te zeggen, mor ain ding is zeker: de kolle wil mor nait kommen. Vandoar dit moal t woord 'kolle'.
De dag dat je van de kolle krimpen as n moes in de snij is nog nait in zicht. Dus last van kolle in d'hakken zal je veurlopeg ook wel nait kriegen. En mocht je, om wat veur reden din ook, toch kolle in d'handen kriegen din is der gain beter middel as wasken mit kikkerrit. Mor ja, woar vin je dij om dis tied.
t Wachten is dus op vorstkolle, omreden dij is gezond wordt r zegd. Van regenkolle krieg je din wel kolle in d'hoed, mor doar brekt joe t kolle en t waarme swait van uut. Nou wil fleddertee wel ais helpen, mor t beste middel is toch n kolleperiode. Aine woarvan joe de kolle over d'hoed gaait. Aine woarin t dus zo kold is as ies.
En as je kolle nachten hebben kin je ook ais n moal van n kolle kermis thuuskommen, nee din? Nou hoop ik wel dat ze joe der din wel weer in loaten en joe nait in de kolle stoan loaten, omreden je din wel ais last kriegen kinnen van n kolle neuze of van de kolle pis. Dat leste is slimmer as dat je kolwottervrees hebben, kin k joe zeggen. Nee, joe moaken din gain kolle drokte om niks en veur dat de kolle weer uut de locht is, is t joe vervast kold over de rogge lopen.
Nou kin je, mit of zunder winterkolle, ook nog last kriegen van kolle kak, mor as ik joe was zol ik mie doar gain kolwinter van moaken. Niks van aantrekken dus. Loat doar gewoon mor even n dikke kolfront overhin trekken. En dij komt vervast nog wel.
Tot aankommen moal. Moi hor.
|
