|
Week 0349
Waark.
Eertieds waren lu nogal biegeleuveg. Zo wol t wel ais gebeuren dat ze snachts last kregen van waarkgaisten. As ze din d'aanderdoags in t inde kwamen, zagen ze dat dij hail wat waark verzet haren. Vandoar dit moal t woord 'waark'.
Dij waarkgaisten haren bliekboar nait Loie Evert op rogge. Nee, zai zetden hail wat uut stro, mor de bewoners vonden t waark dat t daglicht nait verdroagen kon.
Nou is waark t mooiste wat ter is, omreden de volgende dag is der aaltied nog waark over en dat kin je van n metworst nait zeggen. Mor doar het slachter Poater din ook n bulde waark op doan. Net as Graddes en Geertje. Dij haren eerst ook dik waark mit heur baaident. En t duurde nait laank of ze haren kloar waark mit n kander. En omdat t waark in de wereld blift en zai der uutgingen, zöchden ze ook vot mor veur t noageslacht. t Was din ook al vlot jonge wievenwaark mit heur en dat was gain waark zunder hunneg.
Nou binnen der genog manlu dij doar ook wel waark van hebben willen. Ain road, lu. Paas op dat t gain aannomen waark wordt en dat je vergeten dat t waark veur de maaid gaait. Want veur dat je der op verdocht binnen, belandt je deur aal dij allimentoatsies in t waarkhuus. Nou, en din is aal joen waark veur niks west. Nou ja, veur d'aandern din. Veur joe is t aal lege-deuzenwaark worden.
Mor goud. Ik moak nou waarkstalleghaid om of te sloeten. Mien waark zit ter noamelk weer op en mien waarkloon wordt binnenkört weer overmoakt deur mien boas. Of ik ter n bulde waark van had heb? Och, t was gain handtast waark, dat nait. t Was meer overwaark zal k mor zeggen en zoksoort waark wordt voak dubbel betoald. Doar kin je wel waark van hebben.
Tot aankommen moal. Moi hor.
|
