|
Week 0351
Zitten.
Ik wait nait hou of joen dagindailen der uut zucht, mor dij van mie kenmaarkt zok deur op gezedde tieden n kop kovvie te drinken. Dij smokt mie t beste as ik doar even de tied veur neem en, as t even kin, om doar rusteg bie zitten te goan. Vandoar dit moal t woord 'zitten'.
Ie mouten nou netuurlek wel veur joen beeldschaarm zitten blieven, aans heb ik dit stokje ja veur niks zitten te schrieven. Veur lu dij gain zit in t gat binnen of n zittend gat hebben is dat stoer, mor elk is der bie boat om zok zo nou en din even op de zitten van n stoule dele zakken te loaten. Wie hebben ook ja net zoveul van t zitten as van t stoan, nee din? t Kost ter ja niks meer om. En wat mie betreft mag je dammeet best even bie de koekjes zitten dij in t kaaste stoan.
Ain ding is zeker. t Wordt gain haile zit, dus joe huiven nait mit d'handen in t hoar te zitten. Ook nait omdat ter n stropobbe veur t huus van t wicht zet is, omdat heur vrijer heur zitten loaten het. Nee, tegenwoordeg loat aine de partner gewoon zitten, zunder stropobbe. Ze zitten din wel voak over mekoar hin en dat zit ze din wel ais tot hier (of doar) mor dat is in elks geval beter as dat ze achter mekoar aan zitten of dat ze in de bak zitten omdat ze snij dreugd en as zolt verkocht hebben. Kiek, t slachtoffer zit ter din netuurlek op as n bok op d'hoaverkiste, omreden dij kin t ter nait bie zitten loaten of op zok zitten loaten. t Is in elks geval n male boudel as je mit zokswat zitten.
Wel lu, t zit ter eerst weer op. En as ie, om wat veur reden din ook, nog even in d'auto stappen, zit din achter t stuur nait in joen neuze te pulen. Dat liekt noamelk zo maal. Oh, doar zitten ie nait mit? Nou, let ter din mor ais op bie d'aandern. As t even mit zit din...., wat zeg ik? t Zit ter dik in dat ie zo'n neuzepuulder tegen kommen. En dij zit te kiek, dat kin k joe wel vertellen. Mor ja, dij zel der wel nait mit zitten.
Tot aankommen moal. Moi hor.
|
