|
Week 0401
Nij.
t Joar zit ter sikkom weer op. Sunterkloas en de Kerstman binnen weer t laand uut en puten vol euliekouken worden noar huus tou tod. De kniepertjes binnen al mainst weer op en de rollechies worden in t tromke stopt. Aal veurboden veur n nije joar. Vandoar dit moal t woord 'nij'.
t Nijjoarsiezer het zien waark weer doan. De nijjoarskouken binnen bakt en oprold, zodat ter op Nijjoarsdag n flodde slagroom in kin. Ook de Nijjoarskoartjes hangen olderwets aan n sallegoarntje of zitten vast aan d'ain of d'aander nijkocht nijmoots vertuut. Koartjes mit of zunder nijjoarswins van lu dij wel of nait bie joe op Nijjoarsveziede kommen om joe t Nijjoar of te winsen. Zo is t in Nij Bunen, mor zo is t vervast ook in Nijhoof, Nijschaans, Nijwol of Nijkomnij. Joa woar ainglieks nait.
Nou bin ik gain Tuutje Nijneers, mor ik bin benijd woar of ze op t heden nog Nijjoarsbollen verkopen. k Heb t in elks geval nait in t Nijsblad lezen. En ik bin der ook slim nij noar of ie ook noar ain van dij Nijjoarsresepsies goan of mouten en of ie doar joen nijpoetste schounen en joen nij goud ook veur aantrekken. Of denken ie meschain: nij is rij en trekken ie doarom toch mor joen olle plunje aan. In dat geval zellen d'aanwezegen nij opheuren van joen verschienen.
Mor ach, in t Nijjoar mout wat nijlichterij meugelk wezen, nee din. Neem doarom ais n Nijfoundlander mit noar zo'n reseptie. Dat bekomt veul lu nij. Das din ook ja n nijloatje en dat wordt vervast braid uutmeten in de Nijsbode. Mor of ie in t Nijjoar nou wel of gain nije trend inzetten, wel of gain nije veurnemens hebben: ik wins joe in elks geval veul staarkte tou mit t Nijjoarken.
Tot aankommen moal. Moi hor.
|
