|
Week 0403
Aan.
Vandoag de dag wordt ter voak te pas en te onpas van ale kaanten tegen joe aan proat en t is nait aaltied even dudelk wat de bedoulens doarvan binnen. Ook kin je joen aandacht ter din voak nait even goud bie holden. Woar t aan ligt? Tja, wel zal t zeggen. Doarom dit moal t woord 'aan'.
Aandacht wil elk wel ais n moal. Tuurlek, mor t ligt ter wel even aan tegen wel of je aanlopen. Wat mout je nou bievubbeld mit lu dij joe aanvlaigen, aangloepen of lu dij joe n oor aannaaien willen. t Is din aal kommer en kwel. En ooit mouten ook je der aan geleuven as aine joe aanschut, aanstekt, aansteukelt of aanpeerdjet.
"Most die nait zo aanstellen, t vaalt toch wel tou," heur k joe zeggen? Nou din wil k nog wel even wieder mit joe aan loop.
Ie kinnen vervast wel aine dij gaauw aanbrand is. Doar kin je mit perblemen beter mor nait aankloppen. Zo aine lopt votdoadelk rood aan en is din slecht aanspreekboar. Nou huif je joe doar netuurlek niks van aan te trekken vanzulf, mor t kin toch aan joe vreten. n Mins is ja gain eerappel, nee din?
Ie kinnen vervast ook wel lu dij bie joe aanschieten kommen om te zeggen dat veul in t leven t aankieken nait weerd is. t Gaait doarbie din netuurlek nait om joen aigen partner of aanhang vanzulf, mor der is veul te koop wat de muite van t aanschavven nait weerd is.
Nou wil ik best van joe aannemen dat t voak aan de lu zulf ligt. Nait aan joe, mor aan d'aandern. Wizze. Ie loaten allind mor ais n moal t eten aanbranden.
Tot aankommen moal. Moi hor.
|
