Eltje Doddema.

t Mement dat de zummer d'hakken licht het en d'haarst t licht aandoan het hevve al laank achter ons. Ze gingen lopies vot aan ons veurbie en ook de winter is, veur dat we der op verdocht binnen, zo weer verleden tied. Ain ding hebben ze gemain: Der waren doagen bie mit weer woarin n boer zien hond nog nait boetendeure joagen zol. Vandoar dit moal t woord 'hond'.

Honden hejje in alerhaande soorten. Doar is op zich niks mis mit. Mit n schiere jachthond, n traauwe herdershond of n kureg mopshondje kin je prachtege joaren beleven. Minder is t as joen pazzipant n hond van n kerel is. Aine dij bievubbeld bekind staait as de bonde hond of aine dij hoelt mit d'honden doar e mit in t bos is. Körtom, lu woar d'honden gain brood van luzzen. Zo aine kin je beter votdoadelk mor slieten, ook al wait je dat, as je n hond votjoagen je voak n rekel weerom kriegen. Mor as ainmoal n hond aargens tegen aanpist, din doun ze t aalmoal.

Nou wait ik wel dat, as je joe as hond verhuren, je ook de bonken kloeven mouten, mor ik gun joe toch laiver aangenoame hondsdoagen. Je zitten din lekkerder in joen vel en binnen din zo vrundelk as n jonge hond. Je hebben din ook veul meer plezaaier in joen waark.

Nou is n hondeboane netuurlek ook waark en ook din kom je onder de minsen. Je blieven in elks geval aan loop en worden din nait zo smui as n loden hond. Boetendes, n lopende hond lopt aaltied wel wat in de mond. Ook al glimt dat meschain as n hondekeudel in t duustern.

Wat zeggen ie? Ik goa nou van n hond op n kou? Goud, ik geef joe geliek. Doar bin ik gain hond in. Mor din is t leven toch t schierste, lu. Din is de kemedie der toch mor n hondsvot bie en doar zit elk toch op te wachten en te loeren as n hond op n zaike kou.

Nou wil ik gain sloapende honden wakker moaken, mor ain van de kommende weken rieden der vervast weer n aantal lu de Hondsrogroute. Wat? Ie nait? Ie goan mörgen op zien hondjes zwemmen onder plastieken paalmbomen? Wat, ie goan in t bos aan de wandel mit joen aigen hond? Schier toch. Zokse hondedoagen heb ik ook 17 joar had.

Tot aankommen moal. Moi hor.