Eltje Doddema.

Paardielu lopen zok op t heden de kont uut d'hoaken. Ze lopen zok gewoon veurbie en waiten asmis van veuren nait dat ze van achtern leven. Vandoar dit moal t woord 'leven'.

Der is gain beter leven as n goud leven, das woar. En as je leven as God in Frankriek of leven as n muske in t zaand, huif je joe inderdoad naargens drok om te moaken. Mor as je n leven hebben as n loes op n zere kop, bestaait levensgroot t gevoar dat je gain oog meer hebben veur dij dij net te min hebben om te leven en net te veul om te staarven. En dat nog wel heur leven laank. En der binnen nogal wat lu mit zo'n levensverwachten en n levensloop.

Je kinnen netuurlek aaltied wel denken: "Dij din leven, dij din zörgen" of: "Ik bin springlevend, bie mie is der genog leven in de braauwerij en t zel mie de rest van mien levensdoagen wel goud goan." Nou, ik hoop dat je in ale gevallen overleven. Mor bedenk wel, der kin joe aaltied aine leventeg aanvlaigen of aankieken as of e joe leventeg opvreten wil. De kaans dat je leventeg verbranden is en blift ook aaltied aanwezeg. En wizze is dat, as je levensloos binnen der din gain leven meer in joe zit.

Mor goud, lovve mor nait uutgoan van n leven vol levensgevoaren. Alhouwel, as der in t vlees van joen eerstvolgende barbecue leven zit en t lopt joe van de schoalen of din geef ik joe gain gerantsie dat je t ter levend ofbrengen. Mor der is aaltied ain troost: der binnen aaltied wel lu dij din heur mitleven uutspreken. Doar kin je leventeg van op aan.

Nou, bie leven en welwezen bin k ter over vattien doage weer mit n nij woord. En eh..., mochten ie joe noa joen wekelkse gepoedel in joen brobbelbad de toonnoagels nog even knippen willen, knip joe din nait in t leven, omreden t leven is op t heden slim duur.

Tot aankommen moal. Moi hor.