Eltje Doddema.

As je onder t volk kommen en dij ook nog onder d'ogen, din kin t gebeuren dat je joe ondergeschikt opstellen mouten. En ie waiten ja wel: ie mouten joen meerdere onderdoaneg wezen, omreden aans kon je der wel ais onderdeur goan. Vandoar din ook t woord 'onder'.

t Is zo dat, as je bie n boas begunnen, je mainstied van ondern of aan begunnen mouten. Hai holdt joe onder de doeme en joe en zien aandere onderdoanen vlaigen veur hom as makke doeven rondom de doevetille. Hai wil van joe t onderste uut de kanne en t is veur joe din ook: der op of der onder. Joen boas gedragt zok asmis of e onder en boven de wet is en ondertied zörgt hai der wel veur dat e vlot onder de pannen is. Hai holdt noamelk de wind ter goud onder en onder de bedrieven deur krigt e t geld der ook nog onder. Zo kin e n schier onderkommen aanschavven en kin din op tied onderuut zakken en genottern van t rentnaaiern. Din wordt e vanzulf al gaauw net zo stief as n onderdeure mor doar het e onder t kovviedrinken bie de golfclub nait veul last van.

Onder ons zegd en zwegen: hebben ie ook zo'n boas? Hedde joe der ook onder kregen? Holdt e joe ook van ondern tot boven onder schot? Schaande. Din bin ik veur joe te loat om joe onder t verstand te brengen dat dizze ondervinden joe nait t beste leerd het.

En nou we toch nog even onder nkander binnen: hier nog n goie road.
Perbaaier der onderuut te kommen. Loat joe der nait onder proaten en loat joen boas ais n moal joen onderboksem zain. Hai zal din maal opkieken.

En joe? t Wordt doar vervast joen ondergang. Mor das nait zo slim. Ie kinnen din teminnend zulf weer wat aans ondernemen, zodat je joe positief onderschaaiden kinnen. Doun lu. Loat dit nait onder ons blieven!

Tot aankommen moal. Moi hor.