|
Week 0415
Maal.
As je ais n moal de tied nemen om, as t weer t teminnend tou let, even op n terraske zitten te goan, din kin je, tiedens t drinken van joen konsumpsie, joen ogen uut kieken. Wat ter nait aal aan joe veurbie komt, lu. t Schient dat de mode ale teugels lös loaten het en t liekt ter op dat t devies is: Hou maler, hou mooier. Vandoar dit moal t woord 'maal'.
Nou is mode netuurlek n maal onderwaarp om t over ains te worden. n Maal Tais het vervast n aandere smoak as n maalhibbel. Wat d'aine n maal klaidje vindt, vindt d'aander nait maal. Mor der binnen gounent bie dij speulen hailendaal veur maal repel.
Of vinden ie t nait maal lieken as joe der aine tegenkomt mit n stok old iezer deur de navvel, de neuze, de wenkbraauwen of op n maal stee dij je op dat mement nait zain kinnen. Zokswat kin toch gain maaljoagerij meer wezen. Ik vroag mie of, of zok soort lu nou maal in d'hoed binnen of dat t aal maaltoatsies en maalfratsen binnen. Ik vindt in elks geval n maal gezichte.
Der binnen lu dij der maal van worden. Veuraal bie sommege ol lu slagt t maal aan, as t noageslacht t maal vel om het. d'Ollen worden maal in d'hoed as heur kind as n maal hampel bie t pad lopt. t Jonkgoud moakt heur de kop din maal en das n male boudel.
Nou is t zo dat n maalgeboren nooit beter wordt en t gevolg is dat t gezin din leeft as maal törk en maaltezer. En van dat onderlinge gezoes wordt elk de kop maal en paardielu holden der n male smoak in de mond van over.
t Is wat om te leven in de maalmeulen van dizze tied. Mor of ie nou mooi doun of maal doun, bedenk dat ze vrouger al wozzen dat ter gain recht is over male minsen en graauwe törven.
Tot aankommen moal. Moi hor.
|
