Eltje Doddema.

Ie hebben vervast wel ais heurd van de uutdrokken: tegen wil en dank. Dat is aingenlieks dubbel op, omreden dank haar vrouger ook de betaiken van wil of zin. Doarom t woord 'zin'.

Wat ik doarmit in t zin heb? Nou, t is gewoon mor n zin van mie. t Is nait omdat t woord mie nait zint of omdat ik de zin òf heb van t Woord. Nee, t is gewoon even veur poelegrap en oardeghaid en omdat mie t hier bie Dideldom zo noar t zin gaait. t Is mie hier zulfs braid noar t zin. Dus ain ding is zeker: mit tegenzin dou k t nait.

Dudelk is dat t leven veul aangenoamer is as je t goud op t zin hebben en as je overaal zinneghaid aan hebben. As je de zin aargens òf hebben din staait joe de zin al gaauw nait goud. En as t zin nait meer voldoan is din wordt t tied veur bezinnen, omreden n minsken zin is sminskens hemelriek.

t Wordt din tied dat je wat aans verzinnen en weer aargens zin aan kriegen. Aans wordt t leven ook ja zinloos en dat kin nait de zin van t leven wezen. Mor joen keuze mout wel mit t zin gebeuren. Ie hebben der niks aan as je n aander zien zin geven. Dat het gain zin. Want vergeet nait: ain het zin aan de mouder, d'aander aan de dochter. En boetendes: elk mins het zien zinnen en elke gek zien kuren. En das gain onzin.

Nee, je mouten joen aigen zin doun, zodat je weer goud zin hebben. Das goud veur joezulf mor ook veur joen gezin. En eh.... zet geld mor op n zaachte zin, omreden n hìn is n zin, mor gain gewin.

Nou, veurdat t onzinneg wordt en joe de zin van dit alles nait inzain is dit mien leste zin.

Mit vattien doagen weer nij woord. Din heb k ter vervast weer zin in. Zindelk en aal.

Tot aankommen moal. Moi hor.