Eltje Doddema.

In elke gemainte wordt ter deur de verantwoordelken wikt en wogen hou of der mit de sìnterij omsprongen worden mout. n Aangelegenhaid dij ook bie Jan Pebliek gemengde reaksies opropt. Elk wait mainsttied wel road mit de siezen. Vandoar dit moal t woord 'road'.

Der binnen lu dij overaal road op waiten mor vergeten dat ze mit moat en tied te roade goan mouten. Dij bringen din ook voak de haile boudel op roaden. Din hejje de lu dij n road in de wind sloagen omdat ze mainen dat goie road duur is of omdat ze waiten dat veul road nog gain boat is.

Mor ja, dij nait te roaden is, is nait te helpen. t Is zulfs zo dat ain dij gain road hebben wil t op stelten slepen mout. Din mouten ze weer bie aandern te roade dij der meschain wel weer road tou waiten. As je hailendaal roadeloos binnen, kin je der aaltied nog n nacht over sloapen, omreden nacht bringt road. Vast staait: komt tied komt road.

Ook as je joen handen gain road en joen bek gain moat waiten. Dat geldt ook veur de roadsleden in de gemainteroad. Ook as dij zok ais gain road waiten. Veur dij is t in elks geval roadzoam dat ze in de roadszoal de roadsbesloeten pas nemen noa riep beroad en noa t goud roadplegen van de roadsstokken. En dat vaalt asmis nait tou, omreden t binnen voak komplede roadsels.

Nou we t toch over roadsels hebben: wie hebben nog neven tied veur n roadselspultje. Kinnen ie roaden wanneer de hoaze de tanden t mainste zeer doun? Roadselachteg? Nou t vaalt tou. Ik zal t verroaden. As de hond hom gript. Dudelk toch. Nou wait ik dat roaden en gizzen twij ongewizzen binnen doarom nog aine. Wat was was eer was was was? Wat, mout je even roadsloagen en bie n aander te roade goan? Nou, din geef ik joe ain road mit. Wor nait roadeloos as je t antwoord nait roaden.

Tot aankommen moal. Moi hor.