Evert Diekhoes.

n Lutje stainmot in Stad
zat overdag in n duuster gat
snachts kwam e veur n dag
keek of der nog wat lag.
en of hai der wat aan had.

Ain laimeneerstiekje in Middelsom
las limericks op Dideldom
zulf ston hai der nait bie
hai zee 'dat begroot mie'
nou gaait dizze limerick over hom.

Ain Kloosterholtjer hoaze
Dij haar last van kolle koaze
Hai zee tegen eend Waggel
Ik kroep bie de kaggel
Anders trekt t mie nog op de bloaze.

Ain moudermoes oet Lutje Hoeskes
Het n hail nust vol jonge moeskes
Zai hemmeld heur goud
Wat zai ook wel mout
Anders kriegen ze moezeloeskes.

Ain noastdepotpisser van t Knoal
Ging mit zien buurvraauw aan de hoal
Mor dat ging goud mis
Want wat zai nog nait wis
Onder zien toupet was hai koal.

In Weende woonde n knien
Dij wol schaaiden van zien Trien
Mor zai wol dat nait
En tot heur verdrait
Stak hai zien kop in n rudermesien.

Der was ains n beer op Taange
Dij was veur motten doodsbaange
Zien waark dee hai nait
Tot boer zien verdrait
Zien 'dinges' hangt nou in de gaange.

Op de Zandbaarge woont n handeloar
Dij handeld, op zok zulf nait roar
Mor aal wat hai verkocht
Dat haar je nait docht
"Mout aaltied geld bie", zegt hai, "eerlieks woar".

Ain klain krikhoantje oet Zanneweer
Dij was zo hoaneg, aaldoage weer
Mor mit t klimmen van de joaren
Kwam hai tot bedoaren
Nou huift t veur hom nait zo meer.

In Heubultjeburen woonde n zwoan
Dij was gek op levertroan
Zai dronk t mit smoak
En doarom veuls te voak
Noa n overdosis was t mit zwoan doan.

Der was ais n boer in Schaarmer
Dij kreeg t hier aal aarmer
Hai ging noar Canada emigreren
En Engelse toal leren
Noa n poar joar was hai doar faarmer.

Ain poelepetoater op Trips
Dij zegt tegen zien kont van bips
Hai het t hoog in de kop
Was al loos net oet dop
Men zegt hai het gain hazzens mor chips.

In Sodom hebben ze n tellerlikker
Dij gruit gain gram, wordt ook nait dikker
Mit zien hondje is t al net geliek
Vret gain hap, wordt toch gain liek
Zai binnen ja baide mokt deur n beeldenbikker.

Ain Koningspoedel in Spiek
Dij was de koning te riek
Al haar hai ook gain laand
Toch kon hai speulen in t zaand
t Haile aarf was ja zien koninkriek.

Ain lolboksem in Oetwier
Dat was n allernoaste klier
Want zo as dat voak gait
Ain zien lol is anders verdrait
Mor zo'n lolboksem dut dat gain zier.

Twij törreldoefkes in Sloaperstil
Dij wonen in n hail mooie til
Zai hebben zelden verdrait
En dat huift ook ja nait
Elk ken mor törreln zo veul as e wil.

Ain bakker oet Luukswolle
Dij ken mor min tegen de kolle
Veur d oven het hai gain last
Mor bie t venten zain ie hom vast
Mit n pedde op, t is al n hail olle.